قصة واقعيه باللغة العراقيه

[البحريني حياتي]

كان ياماكان في عتيك الزمان
جان اكو بنيه اسمها سندريلا خوش حاته اصيله وعلمودها غنى
حسام الرسام اغنيته العكربه ,,,المهم جان عدها مرت اب
كلش خبيثه وجانت تشتغل ويه الاميركان مترجمة وابوها خطيه
يبيع قوايش مبردات حجم 1100 ابعكد النصارى واحياناً يبيع
شخاط فل خوش ازلمة جان مال اول ,,, وجانوا الكل سايكين
على سندريلا خطيه ..... روحي سوي الجوزة مال المولدة
فصلت ,,, روحي اوكفي سرة على الغاز ,,, روحي لسهام
العبيدي اشتري شحاطات لخواتج ( الي همه 3خوات بس من غير
اب هم خبيثات للهامة ...) روحي شلعي شتايكر السطح ورجعيه
مرة اللخ ,,, روحي جيبي لفات فلافل مشي ,,, روحي بدل
الدهن مال المولدة الاقصى كامت أتفحط ....... وهاي خطيه
جانت كللللللش حبابه وتروح ولا تفتح حلكها ( بس من جواها
جان التقسيم مشتغل ) ...
الــــــــــمهم ... الى ان يوم من الايام جانت دا تصعد
مي ابجليكان ابو 20(طبعا لان المي ضعيف وماكو كهرباء
تصعد بالماطور) لكت فانوس بس شنووو مزنجر وعتيك عبالك
جان ابدوائر الدولة واتحوسم جتي عليه فركته وجرررررررب (
يعني رأساً ) كام يطلع دخان ؟؟؟ سندريلا انرعصت وازبهلت
ورجعت خطوتين لورة بسبب المفاجئه وكالت ::ياااااااا هاي
شنو العالم حته هنا ايحركون زبل وتايرات ؟!!! شنو
هالدخان ؟؟؟
الدخان شوووويه شووويه اتحول الى جني لابس أيدرس مال
برشلونه وبوتين اديدايس وسوار ذهب وحاط معطر freedom
for men
وكاللها :: شبيك لبيك عبدك بين ايديك اني الجني رامي من
العرصات شتريدين اسويلج بس بسااااع وعلى السريع لان
ماما سوتلي مسكول لازم ارجع هسه ...
- عمو جني اريد وطنيه 24 ساعه ممكن ؟؟؟
- ولج بابا هوه انتي ساحب واير 5 امبير من المولده
للفانوس اشون اجيبلج الج وطني 24 ساعه ؟!!!؟شنو جني اني
لو وزير الكهرباء ؟؟؟؟؟؟
- زين عمو عمو اريد قنينة غاز متروسة لان معوزين وكلش
....
- ولج عمو شنو هالحجي؟؟ ولج انتي شكد فكريه ...اكو واحد
يطلب من جني قنينة غاز ؟؟ شايفتني رابط الفانوس على
الحصان
- عمو عمو لعد اشتكدر تسويلي ؟؟؟
- باعي عمو انتي بعدج اصغيرة ومحرومة والامير راح ايسوي
حفلة وادري اهلج راح اتروح شنو رايج اخليج اتروحين
وتتونسين ؟؟ احتمال اتطلعين اب صايه وصرمايه لان الشرقيه
هم دا اتصور هناك حفلة طااااااكه بابه
- زين اشون اروح عمو ؟؟ نفرات لو كيه ؟؟؟؟؟
- بابه انتي معليج هسه غمضي عينج ...
سندريلا غمضت عينها ( ومن الغريب يا جماعة انه اول ما
غمضت عينها ماكامت اتشوف هذا الشي محد لكاله تفسير لي
هسسسسه ) ووووووووجررررررب ( يعني رأساً ) شافت سندريلا
نفسها لابسه تنورة كصيرة وبدي وحذاء مفتوح ابو البلك
يعني طلعت طكوووووووك خالي .... الجني كاللها الحفله
تخلص ب8 ونص علمود منع التجوال وكل هاي الهدوم راح توكع
والحذاء والميكب وكلشي راح يختفي اذا عبرت ال8 ونص
واحتمال تنعلسين بالطريق .... سندريلا كالت ::: حاضر
عمو شكراااااااااااااااا ( هاي شكرا الطويله مال
الزعاطيط )
وصلت سندريلا لبيت الامير جان امسوي حفله لان
طلع 77% بالسادس حيروح اهلي احتمال او طب بيطري بعد
مااعرف و الحفله جانبيها نجود وسمراء وساجده اعبيد (
كله هجع وللكاااااااع رووووح ) وسهام السبتي هم جانت
حاضرة والامير شاد الرباط على راسه وامقندل وصاير طلي
وصلت سندريلا للمكان وبس شافت الامير ........ وفجأة
...( ان ان ااااااان /// هاي موسيقى تصويريه ) نزلت
سندريلا للساحه وبس شافها الامير وعجبته كابلها وجتف
بجتف للكاااع ساعتين من الردح المتواصل وسندريلا نست
روحها ونست الكراب والبهذله ونزلت ( هاهاهاهاها شعر شعر
...) الى انم صارت 8 ونص .... الللللللللللله !!!!
اتلاصت اتذكرت الوصيه مالت رامي الجني وكالت لازم اشطح
وركضت على السريع ( لان القناة مسدود ) جنها برزله هسه
توها امجفتيها ... والامير وراها :: ولج تعاااااااااي
اتخبلتي خوما اتخبلتي ... ولج شجاج مودا احاجيج ؟؟؟ وين
اموليه ؟؟ فضيله ( هلكد ما جان سكراتن نسه اسمها )
المــــــــــهم ركضت سندريلا وجررررررررب وكع الحذاء
( ابو البللك ) ...
الامير شال الحذاء ولزمه وضل صافن على العالم الي
انتبهوا على اللقطه وكاموا ايباعون عليه ,,,, بقى
الاميرشايل الحذاء ومصدوم وصورة سندريلا الحلوة اباله
....الحفله اتوقفت ...العالم سكت ... ( اان ان ااااااان
// موسيقى تصويريه )...
جان يباوع الامير على العالم ... باوع على الحذاء
..... صارت
صننننننطه... جان يكول للناس :::
الشركه العامه للصناعات الجلديه – فخر الصناعه الوطنيه
العراقيه
خبرة وتميز في مجال المصنوعات الجلديه من الاحذيه
والحقائب بأرقى المواد الاوليه
وعاشو عيشه سعيده

ملاحظه
في بعض الكلمات يمكن اخواني و اخواتي ما يفهموها لان كلماتها عراقيه
و لحل هذا المشكله الكلمه الي ما تفهموها قولوها و انا اقوللكم معناها
اوك حبايبي
يا ربي تعجبكم

[هاوي همس]

وين لؤلؤه العراق

ههههههههههههه تعالي شوفي

[البحريني حياتي]

ههههههههه اقول انا صبي بس اختي الصغيرة تدش وتجذب تقول انا بنت خخخ براويها