[الضي السجين]

&& الجزء الثاني &&

+_+_+_+ خذ الهنا من حياتي وعطني شقى حياتك ... مابي البسمه في شفاتي تكفيني بسمة شفاتك +_+_+_+

~~~~~~~~

على شاطئ البحر الأحمر كان واقف ومو حاس باللي حواليه كان يطالع للبعيد للمجهول , كان يرثي حبه ويواسي قلبه .. حبه اللي محد دري عنه .. اللي أتعهد ان مافي بشر يعرف بيه قبل وجود .. ايه وجود .. وآه من وجود .. حلم عمري .. وأملي اللي كنت دايما اسعالوا ..
اللي ياما تخيلت حياتي معاها .. فكرت بكل شي في المستقبل .. بكل شي ..
اتنهد احمد وطالع على ساعته لقاها 11 ونص .. معقولة أتأخرت هالكثر مر الوقت ولا حسيت بيه .. ياترى الحين ايش بيسوون في البيت ووجود ايش تسوي .. بتوافق ولا ترفض !! ترفض ؟؟ ما اظن وجود ترفض ولد عمتها حتفكر بابوها وعمتها وكل شي وأكيد حتوافق ..آآآه يا وجود هذه بتكون آخر مره أصارح نفسي بحبك .. لازم اتناساك لأني مارضاها لا عليكِ ولا على نفسي اني افكر بوحده متزوجة .. ماقول غير ربي يسعدك ويوفقك ..
ومشى احمد من المكان .. مشى تارك وراه حب وعشق ..
مشى بعد ما دفن حبه في أعماق البحر .. مشى وكلنا بنمشي في دروب الحياة وماندري ايش المستخبي ..
.,.,.,.,
في غرفة ساره
ساره : جوجو
وجود : ..........
ساره : جوجه
وجود : .........
ساره بصوت عالي :مرجووووووووووووجه
فزت وجود من مكانها وهي حاطه يدها على صدرها : بسم الله يمه خرعتيني
ساره : احسن والحين قولي تفكر بإيه يا جميل
وجود : حتزوج يا ساره !! وبأقل من شهر
ساره : ايوه يا ستي من قدك .. سبقتيني بالخاينه ..
وجود : ...........
ساره جلست جنب وجود وصارت تمشي يدها على راسها بحنيه : جوجو ( لفت عليها وجود ) انتي رافضة ؟؟
وجود : مدري لكن مو متصورة اني فجأة بتزوج .. ماكنت افكر الحين
ساره : ياقلبي عادي .. وبعدينه حلو عشان ان شاء الله عيالك بتكون أعمارهم قريبه من عمرك وتكونوا قريبين من بعض .. وجود قلبي فكري بالايجابيات مو السلبيات .. وبعدينه انتي عروس يعني لازم تنبسطي اوكي قلبي
وجود بإبتسامه وبعد ما حست براحه : اوكيك
ساره : والحين بره من غير مطرود العرايس لازم يناموا بدري عشان يحافظوا على بشرتهم
وجود وهي مبوزه : لسه بدري ما جات 12 ايش هذا ..
ساره : ولا يهمك بكره من بعد العشاء تنامي ويالله بره ( وصارت تجر وجود بره الغرفة لين ما طلعتها وسكت الباب وراها ) فكرت تروح النت تشوف فيصل في ولا لا بس هونت تعرفوا ما يدخل إلا العصر أو المغرب .. راحت عالسرير ومسكت جوالها لين ما شافت رقم وابتسمت وضغطت على اتصال ..
.,.,.,.,
في المطعم كان جالس قبال بنته يتأملها ..
سما : باباتي افتح الكتشب
فيصل : من عيوني ياعيون باباتي انتي ( وفتح لها الكاتشب واعطاها هو ورجع أخونا يكمل تأملاته )
فيصل : سما انبسطتي ؟؟
سما : ايوه مره حلو
فيصل : ايش اللي حلو
سما : اممممم السفينه والدباب وووو الطيارات والسيجا وكل شي ( وابتسمت ) والبطاطس والكتشب
فيصل : بالعافية حبيبتي
سما : باباتي متى تجي النونو
فيصل : بكره الصباح
سما : تيب
ورجعت تكمل أكلها .. ورجع فيصل يطالعها وهو يحمد ربه على هذه النعمة
.,.,.,.,
بعد رنتين ردت
تهاني : مراااااااااااحب
ساره : سلام
تهاني : وعليكم
ساره : ازيك عامله ايه ؟
تهاني : الحمدلله .. أخبارك انتي قلبي وأخبار وجود ؟
ساره : الحمدلله بخير .. مبروك ماجاكم وتتربى بعزكم ؟ وبوسيلي البيبي كثيييييييييييييير
تهاني : الله يبارك فيك .. وسارونه الصغيرونه تسلم عليك
ساره بفرح : سميتها ساره
تهاني : ايوه يابرنسيسه
ساره : ونعم الإختيار .. اهنيكِ على فنك
تهاني : مو انا اللي سميتها هذا فيصل
ساره : فيصل !!
تهاني : ايوه جاء يحن على راسي إلا تسموها ساره .. انتي ايش عامله بالراجل طالع حنين ورومنسي ورجع زي اول وأحسن ..
ساره بإحراج : ماسويت شي
تهاني : بجد يا ساره أشكرك على تواجدك بحياتنا وحياة اخوي , أشكرك لأنك طلعتيه من حالة اليأس اللي كانت متملكته .. ساره ابغا اقولك شي ولا تزعلي وانتي عارفة اني اعتبرك الأخت اللي ماجابوها امي وابوي
ساره : خير تهاني ايش في ؟؟
تهاني : ساره وربي فيصل يحبك
في هاللحظة توقف الزمن عند ساره حست بقشعريره بجسمها .. وبسرعة انهت المالمكه مع تهاني وجلست تفكر .. فيصل يحبني !! يحبني انا ساره .. بس هو ماقال لي ؟ انا الغبية بعد ايش يقول لي !! فيصل محترم وعارف انو لو قال هالكلام بلعن خيرو .. بس انا ليش ما لاحظت كلامه لي .. كلامه اليوم وامس وقبل امس ..معقولة ما نتبهت ..هل انا غبية او استغبي !! لا انا استغبي ..ولا كل شي يدل انو يحبني .. وانا ! مشاعري اتجاهو ايش !! بس لازم اشوف مشاعري نحوه واحكم بدون أي ظغوط مابغى اصير معلقة كذا .. لازم احدد احساسي ..
( ساره تعرفت على تهاني عن طريق النت من سنه .. وتطورت علاقتهم حتى صارت مكالمات وزيارات بينهم .. وصاروا زي الاخوات .. حتى لمن حصلت مشكلة فيصل .. حست ساره بتعاطف نحوه وقررت انها تحاول هي معاه يمكن تقدر تسوي اللي ماقدر غيرها تسويه !! فاتفقت هي وتهاني وحاولت ساره كثير مع فيصل .. حتى قدر يخرج من حالة اليأس والتشتت والضياع اللي كان فيها )
.,.,.,.,
في بيت خالد كان خالد جالس ومتضايق , كل ما يتذكر ان بكره زواجه يتكدر اكثر واكثر , يحس انه ظلم نفسه وبنت خاله عشان فلوس لا ودت ولا جابت ولا وش اللي حاد بنت عمرها 17 سنه تتزوج واحد عمره 27 لا ومتزوج بعد .. بس ما يقول غير الله يستر ويعين
في الجانب الثاني كانت احلام جالسه بغرفة النوم , وبدت تحس بالغيرة تنهشها .. ياربي انا مدري كيف طاوعت عمتي ورضيت انه يتزوج عليا .. اف ما اتصور بكره خالد بينام بره البيت في احضان وحده ثانيه .. اف ياربي .. بموت قهر .. بس ! بس انا ايش فيني مو كنت متشوقة لهالزواج ايش فيني اليوم كذا لا يا احلام احسن ان خالد يتزوج عشان انت تقدري تعيشين حياتك وبعدينه خالد يحبني واكيد حيبديني انا دايما وهي بتكون صفر عالشمال .. بس لازم اقول لخالد عن فكرتي لازم وعساه يرضى
راحت احلام الصاله لخالد لقته جالس وسرحان في هاللحظة رجعت لها مشاعر الغيرة بس قاومتها وراحت جلست جنبه ..
خالد بعد ما انتبه لها : هلا احلام
احلام : خالد ابغا اطلب منك طلب
خالد : امري
احلام بعد ما بلعت ريقها ونزلت راسها : مابغاك تلمس شعره وحده من وجود , مابغاك تعتبرها زوجتك بجد , خليها زوجتك بس قدام الناس , وانت ماتقصـ
في هاللحظة قام خالد وبدا وجهه يحمر : انتي اتخبلتي
احلام رفعت راسها وخافت من شكل خالد : لا بس
خالد بعصبيه: احلام اسكتي لا ارتكب فيكي جريمه , وجود بتصير زوجتي زيها زيك فاهمه .. اللي تاخذي تاخذو هي فاهمه ؟ وخليك تعيدي هالسالفه مره ثانيه مابيصير خير ..
وراح وخلها مصدومه منه ., ماتوقعته بيفور لهدرجه ..
.,.,.,.,
في بيت ابو احمد كانت الدنيا ماهي شايلتهم من الفرحه .. حتى وجود بدت تتعود على فكرة زواجها ..
ساره : واااااااااااو وجود حنتك عجيــــــــبه
وجود : بجد
ساره : ايش بجد ؟ والله مره روعه وماشاء الله لأنك بيضه طالعه على يدك احلى واحلى ..
وجود : ماشاء الله حتى حقتك روعه
ساره : امممممم هي حلوه لكن لو كنت بيضه بتصير احلى
وجود : بالعكس سارونه انت حلاتك بسمارك
ساره اتنهدت : حستفقدك كثير ياقلبي
وجود وبدت عيونها تدمع : وانتوا بعد حتوحشوني كثير كثير
وجيت لحضن ساره وبدؤا الثنتين يبكون .. وفي هاللحظة دخلت ام احمد :
ام احمد بخوف : بسم الله ليش تبكون ايش فيكم
ساره ووجود بعد مافكوا بعض : لا ولاشي
ام احمد : طيب وجود اخذتلك اجازة الاسبوع الجاي من مدرستك خلاص ..
وجود : طيب عمتي ..
ام احمد : مو ناقصك شي يابنتي
وجود : لا عمتي كله تمام
ام احمد : وانت ساره ؟
ساره : كله تمام لا تشيلين هم يا امي
ام احمد : وجود يا بنتي تعالي معايا ابغا اكلمك ..
وجود بإحراج وكأنها عرفت عمتها بإيش تبغاها : طيب
ساره : وانا امي
ام احمد : لمن تزوجي لكل حادث حديث
ساره وهي مبوزه : كيفك لسه بتعيدي مره ثانيه انتي اللي بتتعبي مو انا
ام احمد : ايوه صح انا اتعب مو انتي
وخرجوا ام احمد ووجود وجلست ساره تفكر باللي شاغل بالها .. تفكر بفيصل من يوم كلمتها تهاني عن اخوها وهي مادخلت النت وكمان انشغلت مع وجود وتجهيزات زواجها .. في هاللحظه اتذكرت انها ما عزمت تهاني ..
اخذت جوالها اتصلت على جوالها محد رد ..
ساره : ياربي ايش اسوي … امممم مالي غير رقم بيت امها هي لسه ما خلصت الاربعين وعساها تكون في
دورت على الرقم لين ما حصلتوا ..
اتنهدت واتصلت دق مره ومرتين والثالثه ثابته انرفعت السماعه ..
…..: الو
ساره : مرحبا
فيصل : مراحب .. نعم اختي
ساره : ممكن تهاني لو سمحت ..
فيصل : ثواني .. طيب من اقول لها ؟؟
ساره : ساره صالح
في هاللحظة وقف قلب فيصل
سارة !! سارة حبيبته تكلمه !! حس بحراره .. بلع ريقة وقال ..
فيصل : كيفك ساره
ساره مستغربه : الحمدلله بس ممكن تهاني بسرعه
فيصل : انتي زعلانه من الكلام اللي قالته تهاني .. لمن صارحتك بمشاعري ؟؟
ساره (فيصل !! انا اكلم فيصل !! فيص ابو سما ؟؟آه يابعدي والله زمان عنه .. اشتقت ليه ولسوالفه ..قطع افكارها صوته )
فيصل : ساره ..
ساره بهمس : ممكن تهاني
فيصل : الحين اناديلك ام ساره ..
.,.,.,.,
هناك ... تقف دائما .. قلوب عاجزه حائرة .. مترددة .. لاتقوى نزيف الجرح... ولاأنين الألم .. ولاطعنات الغدر..
تقف .. ولكنها خالية من الشكوى .. من البوح .. ربما تعشق الصمت .. تناجي السكون .. تركن للوحده بهدوء .. انها طبيعة هذا القلب .. الذي يحمل في ثناياه بوحا محرقا .. يحاول أن يهدأ ولكنه يختنق .. يصارع ويضرخ مرددا ..
أما لهذا الجرح من آخر !
أما لهذا النزيف من نهاية !
الى متى يحمل هذا القلب نوائب حزن مولع بالألم ؟
الى متى .. متى .. متى ؟؟
عندها فقط هل سيبقى هذا القلب حيا ؟
هل سيشفى هذا القلب المثقل بالهموم .. المثخن بالجراح ..؟
حتما انهم لايعلمون ان لهذا القلب .. رحيق من الوفاء وعبق من الكبرياء ..
اتنهدت وجود وسكرت دفترها .. هذا الدفتر ما بدأت تكتب فيه غير ما بعد راحوا امها وابوها وتركوها وحيده .. وحيدة !! رفضت هالفكرة ومالقت غير هالدفتر اللي عاهدت نفسها انو بيكون شريكها ورفيق دربها .. الدفتر مره روعه يعبر عن ذوق وجود لأنها هي عملتوا جلدتوا من بره بجلد خشن وحطي عليه فيونكات ومقاطع شعريه ولونه بني وزينته باللون الوردي .. كان يعبر عن ذوق رفيع .. اخذت الدفتر وحطتوا بالشنطة اللي بتاخذها معاها لشهر العسل .. ورمت نفسها عالسرير .. ياكثر ماتعبت في الأيام اللي راحت الترتيبات السريعه تعبتها كثير كل يوم سوق هذا غير الصالون اللي كانت تروح له تهتم ببشرتها والديكير والمانيكير وشغلات الحريم وامس بس ودت شنطها لبيت عمتها وراحت ساره وخالتها .. وجلست تفكر ببكره .. اليوم اللي تحلم بيه كل بنت .. في هاللحظة دمعت عينها تذكرت دعاوي امها كانت دايما تقول انا بجهزك واودي الدبش حقك واخليك احلى عروسه وابوها .. كان دايما يقول ما اعطي بنتي الا للي يستحقها .. كانوا يتمنون يحضرون هاليوم .. آآآه فيك يا يمه فينك يا يبه ؟؟ بكره زواجي .. ابغاكم تكونوا جنبي ابغا اشوف فرحتكم بعيونكم .. ابغا اشوف دموع الفرح من عيونك يا يمه وابغاك انت يا يبه تسلمني لخالد ..لكن مافي احد بيسلمني لخالد مافي رجال بيوقف جنبي لا اخ ولا عم ولا خال بكون وحيدة في ليلة عمري زي ماعشت سنه وحيدة .. وعسى ما ابقى وحيدة على طول ..
مسحت دموعها وراحت الحمام تتوضا وتصلي وتدعي لأمها وابوها وترجي ربها يوفقها في حياتها ..
.,.,.,.,
فيصل بصراخ : تهاااااااااااااااني
تهاني : ايش فيك اخوي
فيصل : ساره تبغاك عالتلفون
تهاني : ساره !
راحت تهاني رفعت السماعه : هلا ساره
ساره : هلا تهاني احوالك قلبي ؟؟
تهاني : بخير ربي يسلمك .. انتوا كيفك ؟؟ وفينك زمان عن النت في ناس صابهم يأس من بعدك ؟؟
ساره : والله احنا بخير .. والنت سيبتوا عشان انشغلت بزواج وجود
تهاني : زواج وجود ؟؟ ايش السالفه ؟؟
ساره : بكره زواج وجود .. وبصراحه كل شي صار بسرعه .. وانا متصلة اعزمك
تهاني : الف الف مبروك تستاهل وجود .. بس بشري كيف المعرس ؟؟ عساه يستاهلها ؟؟
ساره : هو ولد عمتها اكبر منها بـ 10 سنين ويدير شركة ابوها مع ابوي .. بس متزوج !!
تهاني : يالله عادي حتى لو متزوج مافيها شي .. ياما نشوف وحده رجالها متزوج قبلها وبعدها متهنيه اكثر من وحده هي وحيدة زوجها ... هذا يعتمد عالزوج ومساوتوا بين الاثنين وخوفوا من ربوا ..
ساره : على قولتك.. المهم تقدرين تجين بكره
تهاني : والله ودي بس عاد الناس ايش يقولوا لسه ماخلصت الاربعين ورايحه اعراس .. بس هاه هالله هالله بالصور لا تفوتون ولا شي ابغا اشوف كل شي ..
ساره : هههههههه ولا يهمك ياقمر وكان بودني والله تشريفينا ..
تهاني : ماعليه حبيبتي .. ويالله عقبالك ..
ساره هنا استحت : امممممممم انزين تامرين على شي
تهاني : احلى يالحياء .. بس سلامتك وباركيلي لوجود
ساره : من عيوني .. وسلمي على سارونه
تهاني : ولا يهمك .. يالله مع السلامه
ساره : مع السلامه
بعد ما سكرت تهاني من ساره جلست تفكر
فيصل : آآآه ياحلو صوتها وطبعها وكل شي فيها
تهاني : ........
فيصل : تهاني شفيك ؟
تهاني : وجود بتزوج ؟
فيصل : ايوه سمعت ربي يوفقها ولو انها صغيره بس قسمة ونصيب ..
تهاني : بس ساره ..
فيصل قام من الكنب بخوف : ايش فيها ساره بتزوج بعد ؟؟
تهاني : مالت عليك بس هذا اللي شاغلك ؟
فيصل : اجل ايش السالفه ..
تهاني : لمن سألتها عن زوج وجود قالت فيه اشياء حلوه لكن في النهايه قالت انه متزوج ونبرة صوتها غير كأنها مو مقتنعه ان وجود تاخذ واحد متزوج ..
فيصل بخوف : يعني تظنين اني لو تقدمتلها بترفض وانا كنت متزوج لا وعندي بنت بعد ؟؟
تهاني : مدري ياخوي لكل حادث حديث
فيصل : طيب فين علي ما شفتوا اليوم ؟؟
تهاني : مدري عنو فين ؟؟
فيصل : تهاني منتي ملاحظه من يوم جبتي بنتك زوجك اهملتي .. علي ماتدري فين يروح وفين يجي ؟؟
تهاني بعصبيه : يوووووووووه انتوا ليش ما تقدروا انت وامي وعلي انا عندي طفله اهتم بيها وعلي كبير مو محتاج اسألوا عالطلعه والنزله فين رايح وفين جاي
وراحت لغرفتها وهي معصبه .. اما فيصل جلس يطالع فيها وهو يشوف كيف اختوا اهملت علي بالمره : الله يستر عليك يا اختي لا يجيك بضره ويعينك ياعلي ..
.,.,.,.,

اشرقت شمس يوم الخميس 24-3 معلنه بدأ يوم جديد وفراح جديد واحزان جديده .. اشرقت واخترقت اشعتها بيت ابو احمد ... لمواجهة يوم كلهم مستعدين له ويتمنون خيره ويستعيذون من شره ...
دخلت ساره غرفة وجود : جوجو يالله اصحي
وجود : ليه كم الساعه ؟؟
ساره : اممممممم تقريبا 1 ونص
جلست وجود على سريرها بسرها وشالت اللحاف من عليها : هاه 1 ليش ما صحيتوني بدري ؟؟
ساره : بسم الله ما حصل الى خير ..
وجود : ياربي متى مداني اخذ شاور وغيروا وغيروا اممممم ( ولفت على ساره ) سارونه حبيبتي جهزي الطرحه واكسسوارت الشعر بكيس عشان باخذهم معايا عند الكوفيره وبعد اتصلي على الصالون اكدي عليهم .. وجهزيلي بلوزه تكون بأزارير عشان لمن افسخها في الفندق ماتتخربط التسريحه وبعد اممممم ايوه صح الإكسسوارت والفستان حطيه عند الباب عشان لا تنسونه وايش كمان اممممم ايوه شنطة السفر لا تنسـ
قاطعتها ساره : هيه انتي اشبك يا ماما اعصابك الدنيا ما بتطير شنطة السفر من الصباح راحت بيت عمتك وكل شي تمام لا تخافين ولا تشيلين هم انتي رويقي وهدي اعصابك وبس وكل شي بيكون تمام .. وروحي صلي الفجر والظهر ..
وجود : لا صليت الفجر قبل ما نام بصلي الظهر بعدين بستحمى ..
ساره : طيب ادخلي بسرعه لا تضيعي وقت الساعه 2 لازم تكوني في الصالون ..
وجود : طيب طيب
.,.,.,.,
في بيت ام فيصل .. في غرفة علي وتهاني
علي : تهاني فين الشماغ ؟
تهاني وهي تبدل لبنتها: مدري اسأل الشغالة ..
علي بعصبيه: تهاني انا زوجك انتي مو الشغالة ..
تهاني بعصبية : وانا جالسه اهتم ببنتك ترا مو العب .. لازم خلاص كل شي على راسي ..
علي : ايش كل شي على راسك هذه هي واجباتك كإمرأة تهتمين بزوجك وعيالك .. والأطفال عمرهم ماكانوا حجة .. ورجاء تهاني اتعدلي لأنوا اهمالك ليا زاد كأنك اول وحده تولد .. كل الحريم يولدوا ما يسووا اللي تسوينو..
وخرج من الغرفة معصب ..
تهاني : اووووووووووف كيفه والله مو فاضيتلوا ( ورجعت تلعب مع بنتها )
.,.,.,.,
في افخم القصور بمدينة جدة بدت العالم تجي عالساعه 10 وكان الفرح منظم بجد وكان الكل مبسوط حتى خالد مبسوط ماعدا اثنين .. احمد اللي يحس قلبه من جوه يحترق وهو يشوف العد التنازلي بدأ وتختفي وجود من بينهم .. واحلام اللي ما حضرت العرس وجلست في البيت والقهر بياكلها ..
ساره كان شياكه بجد كانت لا بسه فستان عريان من فوق ومن تحت في جهات طويله وجهات قصيرة كانت الحركه مره حلوه ..ولونه مندمج بين الفيروزي والوردي .. وبما انه شعرها لكتفها سوتلوا فير ومنزلة خصل من قدام ومكياجها كان مطلعها روعه بجد ..
دخلت على وجود الغرفة : وااااااااااااااو قمر وربي قمر قسم بالله قمر ماشاء الله قمر يابنت ارفيقي بالرجال مايقدر على ذا كله ..
وجود : يووووووه سارونه وربي استحي بس خايفة شوفي كيف ( واخذت يد سارة حطتها على قلبها ) شايفة كيف قلبي بيدق ..
ساره : ههههههههه وربي مايسوى عادي ايزي ياقلبي
وجود : اشوف فيك يوم يا ساره بنت صالح .. هين ..
ساره : اوووووف يالحقد ماعلينا وقعتي عقد الزواج ..
وجود وهي قدام المرايه : ايوه خالتي جابتلي الدفتر من شوي ..
ساره : ماشاء الله حلوه يا وجود
وجود بإبتسامه : يا قلبي انتي عيونك الحلوه ..
كانت وجود بجد روعه كان فستانها ابيض وشويه وردي وعريان من فوق وعند الخصر شفاف .. ولأن عند الصدر في حركات كثيره والفستان طالع ثقيل فما لبست عقد واكتفت بالحلق والإكسسوارات اما تسريحتها ولأن شعر وجود طويل فأبدعت فيه الكوفيره وحاولت تبين طوله بحيث انها سوت التسريحه وبعدينه نزلت خصل ومكياجها نعومي يناسبها وطالعه كيوت وتخبل بحق .. والمسكه حقتها .. اللي صممتها وحده فليبينيه فنانه بهالشغلات يعني طلبت من وجود فستان الفرح وناسقتهم مع بعض وخلت المسكه ممكن تنحط على الذراع وممكن تنشال زي السله .. ومزينه بورد ابيض ووردي ..
بهاللحظة دق جوال وجود : سارونه شوفي مين ؟
ساره : طيب
اخذت ساره الجوال وشافت المتصلة امها : هلا يمه
ام احمد : سويره ايش تسوي عندك ؟؟
ساره : ارقص
ام احمد على نياتها: طيب يابنتي تعالي ارقصي تحت مع البنات ..
ساره : ههههههههه احبك يا امي .. انتي صدقتي .. انا جالسه اهدي وجود ..
ام احمد : بغيتي تنسيني ليش متصلة .. اطلعي من عندك لأن المصوره جات وبنطلع خالد يتصور مع زوجته ..
ساره : ليش بتزفوهم الحينه لسه الساعه 1 ونص قلنا الزفة 3 اشبكم ..
ام احمد : لا بس يتصوروا لأن المصورة عندها زواج ثاني ..
ساره : اها .. اوكي خلاص الحين نازله
قفلت ساره من عند امها : وجود الحين خالد بيطلع عشان تتصوروا
وجود : مو قلنا التصوير قبل الزفة ؟؟
ساره : المصورة عندها زواج ثاني بعدنا .. والحين خالد بيجي
وجود : ياربي والله خايفة سارونه قلبي بيوقف ..
ساره : سلامة قلبك حبيبتي .. ربي يوفقك
ونزلت ساره من عند وجود وكل شوي اضطراب وخوف وجود يزيد .. وبعد دقايق انفتح الباب ودخلت منه حرمه بس متحجبه ووراها عمتها وفي الأخير خالد .. وجود على طول نزلت راسها من الحياء .. وخالد للحين ما طالعها ..
ام خالد بإبتسامه : روح يا ولدي سلم على زوجتك
راح خالد بخطوات بطيئه وهو يطلع الجسم الصغير اللي قدامه ومنزل راسه .. قرب منها وباس راسها وهمس لها : مبروك
في هاللحظة رفعت وجود راسها .. وشافت خالد وشافها خالد ..
وجود ( ياويل حالي والله وطلعت تخبل ياولد عمتي )
خالد ( هذه ملاك مو بشر الله يحفظك من كل عين )
وجود ردت بصعوبه : ربي يبارك بعمرك
المصور : هلأ ممكن نتصور
ام خالد على نياتها : شوفي يا بنتي صوريهم وهو جالسن وواقفين وخلي صور بالعرض وصور بالطول .. وابغاك تبيني كل شي فيهم ..
المصوره غمزتلها : ولو لا تشيلي هم ..
ام خالد : الله يكفينا شر هالغمزة ..
وطلعت ام خالد من هنا وبدأت المصورة تصور خالد ووجود من هنا .. وعاد هي جريئة بالمره حتى خالد استحى بس هي ولا عليها .. وبعد نص ساعة خلصوا تصوير وراحت بعد ماخلت وحده من العاملات اللي معاها تتكفل بالتصوير الفيديو وقت الزفة ..
وبعد ساعتين زفوا خالد ووجود بعد ما سكوا الإضاءة في القاعة وخلوا نور بسيط مسلط على العروسين ونزلوا على عدة أغاني يعني مره اغنية ومالوا ومره حبيتها لعادل محمود ومره اغنية قمر لعبدالمجيد وعنيا بتحبك لتامر ومجموعة من الأغاني الرومنسية .. كانت الزفة روعه مع خالد ووجود ..
لين ما وصلوا للستيج وجلسوا على الكراسي وكانت الكوشه على شكل ركن خشبي يعني الكراسي من الخشب وملفوفة بورود .. وبعدها بدأت الأنوار تنفتح وبدأت الناس تبارك وتهني .. والكل يسمي ويقول هذولاء مخلوقين لبعض ..
والساعه اربعه مشيوا العروسين لبيت ام خالد ..
مشيوا لحياتهم سوى
مشيوا وما يدرون ايش بيصير بكره
مشيوا وكل واحد يتمنى انه يقدر يسعد الطرف التاني
ياترى كيف بيكون شهر العسل ؟؟
واحمد هل يقدر يوفي بوعده لنفسه ؟؟
وساره وفيصل والتطور الحاصل بعلاقتهم ؟؟
وتهاني وآخر تجاهلها ومشاكلها مع علي ؟؟
واحلام هل بتنكد احلام وجود ؟؟
المزيد من الأحداث في الأجزاء الجايه ..
واتمنى رأيكم بالبارت ..