قصة غشيييم في المغازل ..نظري وعملي..، شوفوا وش عنده قصه بتعجبكم وتجنن

[هاوي وناوي]

قصة غشيييم في المغازل ..نظري وعملي..، شوفوا وش عنده قصه بتعجبكم وتجنن




المهم وأنا في عز النوم والسعااابيل والا فجأة .. رن التلفون ... وطبعا تلفوننا شايل أبوي منه كل الأرقام .. موب مخلي الا رقمين التسعه والثمانيه .. يعني مالك الا تدق على الشرطه ولا الدفاع المدنـي وغيره مافيه ... المهم اني رفعت السماعه وقول نعم .. الا وذاك الصوت اللي يررد الروح .. صوت بنت .. واخوكم اذا سمع صوت بنت اوجعه بطنــه وانواع الاسهال ... وقالت الووو.. انا ما عاد عرفت وش اقول انشلة براطمي وطلعت كني ياسر عرفات .. ال ال ال ال لوووووو .. قالت .. مين معاااي ..؟؟ قلت .. معااك اناا.. (( صراحه جواب يدل على ذكاائك ..!! ))وهي اللي تضحك ..وانا قلبي احسه مووب طبيعي قـالبها سامري وتستنزل عندي الكبد والبنكرياس انواع الربكه .. وقالت لي .. سوسو موجوده ..؟؟ قلت لها .. ما ينفع طـوطـو ..؟؟ قالت مين طـوطـو ..؟؟ .. قلت .. هذا اسـم الدلـع حـق الطاووس اللي هـو انا . !! وضحكت للمره الثاانيه على التوالي .. وقالت .. يؤيؤ .. شكلي غلطانه .. طيب آسفــه ... قلت لها .. لاعادي.. لا شكــر على واجب .. (( دايم اسمع ها لكلمه .. وجالس احتري الفرصه اني اقولها ..!! )) ..وقفلت السماعه ... :تصدقون .. ما ادري وش صار فيني .. حسيت بقشعريــره في جسمــي ..

وان الافرازات الخشـم عندي زادت .. وان ودي اروح انبطــح في الحو وشو اكتب قصيـده هجائيه .. لا يكون هـذا هــو الحـب اللي يقولون ..(( لعن ابو الحب اللي تعرفه يالضفــدع ..!! :المهــم .. انـي قررت انــي اتعرف على بنات ... بس فيــه مشكلــه وحـــده اللي هـي انـي ماعنــدي اسلووووب ابــد ...(( يعنـي وقفـت على الاسلوووب .. لعن ابوووك انت عندك الف مشكلـه مو مشكله بس .. واهمهااا مشكلــة وجهـــك اللي كنـه لوحة انتبه امامك نقـطة تفتيـش ..!! )) الوكاد اني مالقيت قدامي الا واحد مـن العيال اسمه عبدوش .. معروف ان البنات ما يعوقون معـاه .. وانا اللي اللقـط مفتاح سيارتي واروح لــه الوكاد .. انــي رحــت لعبدوش .. وعلمتــه بوضعـي وان امنيتــي في الحياة اتعرف على بنـت قبل ما اموت .. (( اخسسس يالشااايب ..!! )::فقال لي .. السالفه بسيطــه .. اذا بغيـت البنـت تحبــك حسـسـها انها احسـن وحــده فـي العالم ... قلت لـه .. يعنـي كيــف .. يعنـي.. يعنـي كيــف .. يعنـي اقولها انتـي احســن مـن مرادووونا ...!! وهو اللي يرفسنـي برجلــه فـي بطنــي .. وقال لي .. انت ثور .. وش دخل مارادووونا يا لغبـي .. !! انا قــصدي انـك تحسسها بانوثتها وان ما فيه بنت غيرها في العالم .. قلـت لـه .. برضه مافهمـت .. يعني تبينـي اذبـح كل البنات واخليها لحالها ! وهــو اللي يموه علـي برجلـه ويمحطنــي بيــده علـى جبهتـــي ..... وقال لي .. شوف انت حمار .. وما راح تفهـم الا بالدروس العمليــه ...
ويطلــع جواله ويــدق .. وقال لي .. شوف انا ها الحين با كلـم وحــده.. . وتعلــم .. قلت لـه .. طيـــب ... وكلم .. وقال .. هلا حياتي هلا عمـري هلا روحي ..انا لــؤي حبيبـك ومجنونك .. (( الحمد لله على العقل .. لعن ابوك وين لؤي معــه .. والله لو اشوف وجهـه في احســن الاحول بعــد ما اعطيــه غيـر اسم جعـفــر ..قال ايش قال لـؤي ..!! )) .. : وقام يقول لها .. احبــك واموت فيــك ..مثل السواق بدون سياره .. اناا البنـزين وانتــي الشراره .. انا الشارع وانتي الاناره ..انا الرومانسيـه وانتـي الاثاره انا مبنى التجاره العالمي وانتـي الطياره ... (( قســم بالله اني بغيـت اضمــه وابوسه يوم سمعـت كلامه ..حسيت بشعوور غريب .. لعن ابليسه لو يكلم جدار كان ذاب )) المهم .. انه خلـص المكالمـه .. والتفـت لي .. وقال لي .. يالله دورك ..باعطيـك رقـم بنــت وكلمها .. وقوول لهاا نفــس كلامي ...قلـت لـه بكـل خجـل .. طيـب .. وهو اللي يــدق علــى بنــت ويعطينـــي الجوال عشان اكلمها ... وانا اللي اقول الووو .. ويوم سمعــت صوتهاا ضاعت علومي .. ونسيـت كل الكلام .. وقلت لها ..بابا فيـــن ..!! وما حسـيت الا بذيـك الجزمـه اللي لازقـه في مقفاي ... وقال لي .. قـول نفس الكلام اللي قلتـه يالثوور ... وانا اللي اقول لهـااا... هلاا حياتي هلا روحي هلا تعالي .. وقالت .. طيب وبعــدين ... قلت لها .. انا بدونك مثـل الكيبورد بدون فاره .. مثل التقاطع بدون اشاره ..مثـل الحمار بدون حماره ... مثل السلطـه بدون خياره .. انا محترف وانتـي نظام الإعاره ... انا الولاعه وانتـي السجاره ... انا الددســن وانتـي الغماره ... انا الصرصور وانتـي البياره ... انا طوووط طوووط طوووط طوووط ... قفلـت الخـط في وجهــي ....قال عبدوش .. وش فيــك ؟؟ .. قلـت لـه .. لا ابــد الخــط مشغوووول ...!!(( مايعرف يصرف ابــــد ..!! )) ومادريت الا وعبدووش مطلــع لوح فيه مسامير ودبجنــي فيــه اللين قلــت للعنــز ياخاله ...:

المهـم .. اني رجعــت للبيـت ودماني تصـب وماليه وجهـي من كثر اطق اللـي جاني مـن عبدووش طالع كنـي مسابقـة .. مـن صاحب هــذه الصوره .. اللي يحطونها في المجلات ... وانا اللي ادخـل البيــت بشويش عشان ما يشوفني احــد .. واطلـع غرفتي واسكــر الباب وانام ... وفـي عــز النوم .. دق جرس التلفون .. وارفع السماعه .. الا هـي نفـس البنــت اللي كلمتنـي اول مره .. قلـت .. نعــم .. قالت .. سوسو موجوده ..؟؟ قلـت لهـا .. شوفي .. بيتنا كلــه شباب .. ومافيه احـد يبدا اسمـه بحرف السيــن .. انا واخواني كلنا اسمنا خالد .. وما فيه الا اخوي الصغيــر فهــد هو اللي اسمــه نايف ونناديه عبدالرحمـن .... (( وش عنــده عادل امام..!! )) والبنــت كرتها ضحكــه .. وقالت ما شاالله دمـك خفيــف ... (هي تحسبني استهبل ما درت اني دلخ من جد )) وقلــت لها .. شكــرا .. (( مسوي مؤدب ..!! )) وسـألتنـي البنــت .. وش تسوي هاللحيــن ..؟؟ .. قلت لها . والله كنـت نايم . قالت يؤ يؤ تنام في الليل انــت ..!! .. قلت .. اجــل متـــى انام ..؟؟ قالت .. لا انا انام في النهار واسهر في الليـل . قلـت لها .. ليـش الاخـــت بووومـه ..!! قالت .. لا بس الليل وقـت الرومانسيه .. انت تعرف الرومانسيه ..؟؟ قلت لها .. لا والله ماا اعرف بنات انا .! (( مسووي فيها فاهم ..!! )) وسألتنـــي .. انت وش اسمــك ..؟؟ قلت لهـا مصيول قالت وش معناه ..قلت لها .. هذا اسـم كلـب كان عنــد جـدي وسماني ابوي عليـه لانـي اشبـهه .... وسألتهااا .. وانتــي وش اسمــك .. قالت .. داليدا .. قلت لها .. انا ابي اعرف اسمــك موو عيارتك ...!! قالت .. هــذا اسمــي ..!! ( هذوللي البنات .. تسألها وش اسمـك .. تقول رهـف ولا شووق ولا افنان .. ولوو عذري بس انه من جنبهاا ..!! )) سوويت فيها اسلوب وقلت لها اني حبيت وحده بس انتهى هالحب .. لان اللي حبيتها خانتني ... قالت لي .. من حبيـت ..؟؟ قلت لها .. حبيـت عنـز جيراننا .. بس انهاا خانتني مـع تيــس سوري عشان لـه قــذلـه ...!! المهم .. ان البنت قالتلي .. اوكي اكلمك بكره لان امـي تنااديني .. قلت مو مشكلــه ..

وتطورت العلااقه .. وصرنا نكلم بعــض كـل يوم .. وانا انقلــب حالي .. ولاحظوا اهلــي انــي تغيــرت .. يعني نكون جالسين على الغـدا ولا العـشا وانا ما آكــل .. ساااارح وانغــف .. وبعـض المرات انسى اصبعـي داخل خشمــي ولا حظوا اهلــي انـي صررت مؤدب واقرأ واجد .. وانا اقرا عشان اعرف كلام جديد في الحـب .. تلقاني اقرا كتـب الشعــر والحب والطبـخ .. (( لا تستغربون لان كتب الطبخ اتعلم منها كلام حلو بعـد مثـل .. يا عسـل , ياحليـب , ياقشطـه , ياكريم كراامل ..!! )) وبرضه صررت ادخـل كتــب ممنوعه للبيـت .. مثل كتاب .. ماذا تفعـل في ليلـة الدخلــه .. وكتاب .. سنـه اولى زواج ... بس المشكله انهاا ضاعت هالكتـب منــي وصرت اروح عند بيارة جارنا اللي طافحه واقعـد افكر واتـأمل وارمي حصى وسط البياااره ....(( مسوي رومانسي .. مثل اللي يجلسون على البحر ويرمون حصى ..!! )) المهم .. انه في ليلـه من اليالي .. قالت لي البنـت 00مصيول.. اوصـفلي شكلــك ..!! يا ولله البلشــه .. وش اقولها هذي هاللحين ..اقوولها اني قرررد .. اعتررف لهاا بالحقيقه المرره واقووولها اني جدار مالي ملامح ... اعترف لها اني شبيه عبدالله سليمان((الف حمد لله وشكر ))الوكاد انـي قلت في نفسي .. يا ولد خلني اسوي مثـل كل الشباب .. وانصـب عليها يعني تلقـى الواحد من الشباب شيييين واذا شفته في الشارع ماتدري هو رايح ولا جاي لان وجهـه ماله معالم .. ولو تشوف وجهه تحسبــه واحد معطيـك مقفاااه .. يعني مفروض يحـط لوحه على وجهـه ويكتـب .. ترى هذا وجهـي .. عشان الناس ما يلخبطون بين وجهه وقفاااه .....وانـا مثلكم وردى بعــد .. انا اذا قابلت احد يجلس ساعه محتار وين وجهي من قفاي وما يعرف الا اذا لقـى الوورقه .. لان فيني ورقه مثل اللي تجي في الفنايل والسراويل عشان تعرف ورررى من قدااام ...!! المهـــم .. انـي قلـت لهــا .. انا عيوني مثل عيون جواد .. وطولي مثل طلال الرشيـد .. وخشمـي مثـل خشـم خالد عبدالرحمن .. وملحـي مثل ملـح راشد الماجد ..ومهضوم كثير مثـل رامي عياش ... (( والله ما ناقص الا تحط ملحـن معاهم ويكمـل الاوبريت ..!! ))


الوكاد .. ان البنــت شكلها خقـت معــي وقامت تشاهق من الفررحه.. وسألتها انا وانتي ووصفيلي شكلـك .. .. قالت .. ما اقدر .. لما تشوفيني بتعرف .. لان مالي شبيـه ..
(( اخسس يا بريتنــي ..!! )) .. وانا اللي افـك_ خشتــي وسعابيلي تقووطر .. كني كلـب شايف له عظمــه ... وقلت لها .. يعني باشوفك ..؟؟ قالت .. اكيــد .. انا بكره باروح شاليهات اليمامه اللي على طريق الرياض الخررج .. ونتقابل هناك .. قلت لها .. بس هذيك للعوائل بس .. قالت عاد انت دبرر نفسـك ... قلت اووكي موو مشكلــه بس كيف اعرفك ... قالت بيننا الجوال .. اذا وصلت كلمني وانا اعلمك وين تلقاني .. قلت لها خلاص الوعـد هناك .... المهم .. اني انا توهقت .. وش لون ادخــل الشاليهات وهي للعوايل ... وقلت مالي الا عبدوش .. اتصل عليه واتفاهم معااااه ... ودقيت عليه .. ورد علــي وقال بعصبيه .. نعم وش تبـي يالغبـي ..؟؟.. وعلمتــه بالسالفه من سلسل اللين طقاق عليكم ..((تراني اقصد من طقطق اللين السلام عليكم بس مدلخ شوى ))وقال لي .. والله صعبـه وش بتسوي .. قلت له .. وش رايك تلبس عباة وتسوي نفسك حرمه وترو معي على انك زوجتي ... وهو اللي يتغير وجهه وقال .. انا ولـد ابوي .. قلت له .. بالله .. توني ادري .. كنت احسبك ولد ابوي انا.!! قال ..تستهبل يالزبال .. انا اسوي نفسي حرمه .. ياويل ويلي ويلاااه .. خيل الخيـل خيالها .. قلت له .. يارجال كلك تبـن لادووس في بطنك ..جالسين في مضارب الباديه احنا..!! .. قال لي .. لا يا مصيول هذا شي ما اقدر عليـه .. وش اقول للجماعه ..؟؟ قلت له .. ومن قالك اننا بنحضر عرس .. حنا بنروح الشاليهات .. وانت ماراح تكشف وجهـك ابــد .. قال .. طيب ليش انت ماتسوي نفسـك حرمه وانا الرجال ..!! قلت لـه .. ياخوي انا ما اقدر .. لاني لا رجال نافع ولا حرمه نافع ..وبعدين حتى لو غطيت وجهـي بيكشفوون اني ماني حرمه من ريحتــي اللي كنها ريحـة شرابات عزوووبي ... قال لي .. خلاص .. بس لا احد يدرري ... قلت لـه .. ابشــر .. بس جهز نفسـك بكرره بامرررك ونروح ...

وأخـذت سيارة واحد من العيال .. ورحــت لبيت عبدوش ولقيت عنـد باابهم شحاده وهي اللي تجـي تبي تركب .. قلت لها .. الله يعطينا ويعطيك ياخاله .. وهي اللي تطق قزازة السياره شوي وتكسرها .. واناللي اطلع من جيبـي ريال ونص كنت ناوي اشتري فيـه توكـس .. بس قلت مو خساره فيها عشان الله يوفقني .. وتوني افتح الدريشـه باعطيهااا .. الا وهي تقول افتح الباب الله ياخذ هالراس ..... الصوت موو غريب علي ..يوووووووه عبدوش.. قال .. اييه عبدوووش الله لا يبارك فيك .. افتح بسرعه قبل ما يطلــع احد من هلـي ... وفتحــت لـه الباب وركب .. وانطلقنا للشاليهات ... المهم وصلنا الشاليهات .... ونزلنا من السياره .. وامســك يـد زوجتي .. اللي هـي عبدوش سابقا ... ودفعنا التذاكر .. ويوم جينا بنـدخل .. وقفنا الحارس اللي على الباب .. وقال .. لحظــه لازم زوجتك تـدخل محـل تفتيـش النساء لاننا شاكين فيهـا .. قلت لــه .. لييش في مطار حنا .. تراه شااليهات .. بعدين وش فيها زوجتي ...؟؟ قال الحارس ... ياخوي وش هالحرمه اللي لاابسـه نعال زبيريات....!!!!! وانا اللي اناظر في ارجول عبدوش الا فعــلا لاابس زبيريات ..!!!! يالله لا تفضحنا بـس ... وانا اللي اقول للحارس ممكن تتركني معا زوجتي .. ابيها في كلمـة راس .. قال لي ادخل هالغرفه الفاضيه وتفاهم معاها ... وانا اللي اسحب عبدوش للغرفه .. واترفس في بطنــه وانواع الاكواع .. لعن ابوك يالغبي زبيريات مرره وحــده ... قال .. وش اسوي مالقيت جزمـه كعــب على مقاسي ..... وقلت له ..اسمع نزل العباة على ارجولك عشان مااحد ينتبــه يالغبي المهم .. اننا رجعنا للحارس .. واعتذرنا منه على سووء التفاهم ..ودفيناه بميـة ريال عشان يسكــت ... واول مادخلنا استاجرت شاليه صغيـر وقلت لعبدوش يجلــس فيــه .. وانا باروح ادور خويتي ....

وطلعــت .. ودقيــت جوال على خويتي .. ووصفــت لـي مكانها ... تقول انها عنــد الشجـر اللي جنـب المطعــــم ... وانا اللي اروح هناك .. واجلـس ساعتين ادورها ومالقيتها ... وادق عليها جوال قلـت لها .. وينك فيــه لي ساعتين ادورك ... قالت .. انت ويـنك بالظبــط ؟؟؟.. قلت لها .. انا وااقـف جنـب كيـس زبااله .. وانتـي وينــك ..؟؟ ..قالت .. اناا واقفه جنـب واحد شكلــه مجنون وعليه قل صـح ... وانا اللي التفت وراي .. اوب .. هــذي هــي .... (( افا طلعـت انا المجنون اللي تقصـده .. وطلعـت هي كيـس الزباله اللي اقصــده ..!! )) وهـي اللي تنصـدم .. وقالت .. هــذا انت ..!! وين الوصـف اللي تقول .. اجل طلال الرشيــد هااه .. امحـق طلال اللي تشبـه لـه انـت ... (( صادتني ان عيوني مثل عيون خالد الملا .. وجسمي مثل نبيل شعيل .. وخشمي مثل عبد المجيد عبدالله ..!! )) .. قلت لها ..لا انا فعلا مثل ماقلـت .. بس صار لي حادث هو اللي اثــر على وجهــي .. ولا انا كنـت حلوو ... (( اييه هيــن ..!! )) قالت .. مو مشكلــه اهـم شي اسلوبك اعجبنـي .. قلت لها .. اشوى ان اعجبـك شـي فينــي .... وطلـبت منها انها تووريني وجهها .. قالت .. طيب بس لا يشوفنا احـــد .. وانا اللي اغطــي عليها .. وقلت لها .. يالله بسرعه .... وهـي اللي ترفــع الغطووه .. وانا اللي اضحـــك ..!! قالت .. وش فيــك تضحـــك ..؟؟ قلت لها .. يالله عاد بدون استهبال ....!!قالت .. وش فيـــك ؟؟ .. قلـت لها .. يالله بسرررعه شيلــي القناع اللـي على وجهــك لااتستهبليــن ....!! وهي اللي تقول .. هــذا وجهــي الصدقــي يالقرد ... وانا اللي انصـــدم واحـس ان الارض تدور فينـــي ... وش ذا الوجـه الشييييين .. اوول مررره اشوف وجـه يطلــع منــه ريحــه مخيســه ...

لعـن ابووها حتـى الشجــره اللـي كنا واقفيـن جنبها رفعـت ثووبها وانحاشت .. وكل الشجر اللي كان حولنا انحاش وراح وقـف في مكان ثااني بعيــد من شيــن وجهـها ... وانا كنـت حاط في بالي كلام رومانسي جلست عشرين دولار يوم احفظ فيـه .. عشان اذا شفتها اقوله لها .. بس يوم شفت وجهها اللي كنـه وجـه واحد جالس في مجلس رجاجيل وفيـه اسهال ... وضيعت كل الكلام اللي حفظتـه وقمـت الخبـط في الكلام .... سألتـها .. ليـش الغمـص ساكـن عيونك ..؟؟ جاوبتنـي قالت من الأرق.!! سألتـها .. طيب وش هالببسـي اللـي مكبوب علـى ثوبك ..؟؟ جاوبتنـي .. هـذا موب ببسـي .. هــذا مـرق ..!! سألتهـا .. طيب ماعندك غيـر هالثوب ..؟؟ جاوبتنـي .. الا كان عنـدي بـس انســرق ..!! سألتهـا .. طيب مادامك شينـه وشهـولـه تغازلين ..؟؟ جاوبتنـي .. انا كنـت حلووه .. بس ان وجهـي انحـرق ..!! وسألتنـــي .. وش رايك فيني .. ما اشبـه باسكال ..؟؟ جاوبتهـا .. انتـي جسمـك جسـم باسكال .. بس الوجـه الله خلـق وفرق ..!! المهـم انـي ماقـدرت اتحمـل وجـههـا وقلـت لها .. انتـي جــدك الاكبــر كاان غووريلا ..؟؟ قالت لي .. لا تطنـز انت ووجهــك .. انا اول كنـت مصـدقه ان الديناصورات انقرضت .. بس من يوم شفـت وجهــك عرفت ان هالكلاام اشاعات .!!! قلـت لها .. شوفي ياآنســه جراده .. انا ودي اجاملك واقولك كلام حلــو .. بــس وجهــك يقول ما لك امـــل ..!! قالت لي .. والله حتـى انا بعـد ودي اقو لك كلام حلوو .. بس وجهــك ما يساعد .. وجهـك كنــه دعاية لا للمخدرات ..!! المهــم .. ان كـل واحد منــا تفــل فـي وجـه الثاني ورحنا ... وانا مـن الصـدمـه توقف تفكيــري .. كل آمالي واحلامي راحت ادرااج الدواليب ....

وركبــت السياره .. ورجعـت للبيــت وانا متحــطم .. كنـت متخيــلها مثـل مايا نصــري ولا اليسـا .. وطلعـت مثــل فطوومـه
لا خلاص ماعاد ابــي اتعرف على بنات ...(( تكفـى آخر مره .. حرام تحطـم قلوب المعجبات يا راغب علامه .. اقول انطم بس)) الوكاد .. انـي سكرت باب الغرفـه .. ونمــت نوومة عدوكم .. (( مسووي علوم رجال ..!!))

وما دريت اليوم الثاني الا باللي يررفس الباب .. وانا اللي انقز من فراشي ... وش السالفه يالربع .. الاا وهو ابووي يصايح .. افتـح يالسمرمـدي .. افتـح لاباارك الله فيــك ... وانا اللي افتــح الباب .... الا وابوي في وجهـي ووجـه ما يطمئن .. ويطلـع ذيـك العجرا من مخباه .. وانواع التلحيـــط .. واخواني وامــي وااقفيـن عنــد الباب يتفرجون الانذال ... من لقاهاا مصارعه على الطبيعــه .... المهم .. ان ابوي شغال ضرب فيني ويقول تتزوج من ورانا يالخسيــس .. قلت لـه .. والله ما تزوجت ... قال .. الا .. لان الشاليهات اتصلوا علينا وقالوا خـلوا مصيول يجي ياخذ زوجته اللي نساها امــس ... وانا اللي تضيـع علومي .. وابي افهـم ابوي السالفه ..بس انــه شغال ضرب فينــي .. ماترك لي فرصـه .. وبعــد جـهــد جهيــد قــدرت انفــك مـن ابوي .. ورحـت لآخــر الغرفـه ..وياخذ ابوي نعال ويرميها علــي ... واناا اللي اوخــر عنها بـسرعـه وامسكهــا بفمــي ...(( متأثر بالأفلاام ..!! )) واخواني يوم شافوني سوويت هالحركـه وهـم اللي يصفقون ويصفرون لــي ...وانا اللي اتحمــس .. وانـط على ابوي وامسـكــه مسـكــه منومــه.. (( خربها الغبـي مع ابوه ..!!
وينـط واحد مـن اخواني ويمسـك يـد ابوي ويرفعها اول مرره وطاحت ويرفعها ثاني مرره وطاحت .. ويرفعها ثالث مرره وطاحــ... لا لا لا لا غيـر معقول ... رفـع ابوي يــده وقام يأشر باصبعــه يعني لا تراني مانمــت ....!! ويوم شفتــه مانام .. وانا اللي اقوم وامسـك ارجوله .. واسوي لـه حركـه مقصيــه عشان يستسلــم .. بس ما استسلم .. واخواني يقنعونه انــه يستسلــم بــس هــو عنيــد يحاول يـزحـف عنــد الحبال .. بس انا ما خليتــه ينفــس ... وفجــأه .. اوووه .. لا تــدخل خارجي ... امــي جابت المقلاة ومحطتنــي علــى ججبهتـــي محطــه مــدويه ... وتدخلوا اخواني ومسكــوا امــي وطلعوها برا الحلبــه .. ((عائله دلووووخ )) المهم انــي دخــت وماعاد ادري ويـن انا وطحــت مكاني .. ويزحـف ابوي بشووويش .. ويحـط يــده على صــدري .. ويعدوون اخواني.. واحد .. اثنيـن .. ثلاثـه .... فاز ابوي هييييييييييييييييه ..((الحمد لله والشكر))
المهم اني فهمت ابوى السالفه ((ما اصلح في جريات ابد اعلم واكع على طول)) ونمر بيت ابو عبدوش ونعلمه وانواع التمحيط فيني المهم انا وصلنا الشاليهات وقلت له معى لك مفاجأه وهو اللي يضحك قال والله اني خابرك ذيب ما تترك خويك كذا هذا الرجال ولا بلاشوو وان اقول في صدرى ايه هين وهو يقول اكيد بتعرفني على وحده من خواتها قلت ايه انا بعرفك على وحده صحيه 00 وهو يبي يشوف المفاجأه بيفصخ العباه قلت لها خلها عليك كذا احسن((انواع النذااله فيني)) وصلنا السياره .. الاا وابو عبدوش ماسك مفــك العجـل فـي يــده يحتــري ولــده ... وعبدوش مـن هول الصــدمه ماعاد شالته رجليــه .. طاح مكانه وقام يصيـــح ويولول ... واستلمــه ابوه انواع تفقيــع الوجــه وانواع الترفيع والتنزيــل .... وانا جالس اتفرج ومبسوط .. ومادريت الا وابوي ماسكني وانواع الركب .. وانا اللي اصيــح فيــه .. هيه يابو الشباب .. حلاوا هــي ..!! تووك طاقني قبـل شوووي ...!! قال ابوي ... اييه صحيح .. بس عيـب الرجال يطـق ولــده وانا جالس اتفرج .. لازم اسوي شـــي انا بعـــد ...(( لا صراحه ان ابوي فاهم في الاصول .. طالع لي ..!! )) المهم .. عقــب الطــق اللي كليتـــه انا وعبدوش .. تزاعلنا مـع بعــض .. وانا حرمت اتعرف على بنات .. ومثل ماقال المثــل .. ابعـــد عــن الشرر ياعمري وغني لوووووه .. ودان دان لدانه داان واااويلوووه مشكلني حبك يارووح الرووح مشكلنـــي .. يالبيه يالبنات اللي مع راشد في الفيديوو كليـب .. اروووح طحينيــه معاهم ... ((شكله ماتاب ناوي ينطق مره ثانييه )

منقوووووووووووووووووول

[أبو مروه]

والله حلوه مشكور أخ هاوي وناوي

[غرنوج]

أعوذ بالله الله يرجك هاوي والله اني ماسك روحي والا فيني ضحك يكفي العالم كلهم وعلى آخر شي يوم الشجر انحاشوا الا وافكها والعالم في المقهى يناظروني يقولون ذا شكله فيه شي


مشكووور عالقصه واي شي عندك زي كذا بالعبارات اللي تمغص البطن عطني ياه عالخاص


اخوكم المحب غرنوج

[دروب المحبـــــة]

هااااااااوي ناااااااااااااااااااااااااااوي

حلووووووووووووووووووووووووووووة وجميله بس طويلة القصه

تفقعت عيووووووووووووووووووني ونا قاعد اقراء

يعطيك العافيه