 | ||||
 | دردشة رورو |  | ||
 | ||||
 |  | |||
 | ||||
 | | | | |
سبحان الله وبحمده سبحان الله العظيم
| | ||||
| | دردشة رورو | | ||
| | ||||
| | | |||
| | ||||
| | | | | |
سبحان الله وبحمده سبحان الله العظيم
  |
يوم الخميس القادم هو يوم عرفة , وفضل
صيام هذا اليوم ، جاء عن النبي صلى الله عليه وسلم
أنه قال :"
صيام يوم عرفه أحتسب على الله أنه يكفر السنة التي قبله والسنة التي بعده
"
[ رواه مسلم ] . فصومه
رفعة في الدرجات ، وتكثير للحسنات ، وتكفير للسيئات .
فـ أغتنم هذه الفرصة وصوم هذا اليوم لتكفير
سيئاتك وتكثير حسناتك وذكر الآخرين بهذا اليوم العظيم
|
| |||||||
| التسجيل | تعليمات | قائمة الأعضاء | الأوسـمـة | التقويم | أعمال مميزة | مسابقات المنتدى | اجعل كافة الأقسام مقروءة |
| قصص وحكايات وروايات قصص عربية , قصص أطفال , قصص غراميه , قصة قصيره , قصة طويلة , روايات , قصص الانبياء , قصص واقعية , قصص من نسج الخيال , قصص موروثة , حكايات عربيه , قصص طريفه , قصص السيرة , قصص الأغبياء , والكثير |
 |
| | LinkBack | أدوات الموضوع | طريقة عرض الموضوع |
06-20-2006, 03:07 AM
| رقم المشاركة : 181 (permalink) | |||||||||
|
| وهني يقول لها سعيد ..وهو اللوم ماكل وجهه ..: امي .. تخلي نفسج مكاني .. شنو بتسوين ... احس انه ما ليه وجه ادخل بيت مطر اكثر .. حادث خليفه بسببي .. سفره بسببي .. تفكك عايله مطر لاشلاء بسببي .. وصول ساره للمستشفى في نص الليالي بسببي !! .. امي .. مليت من هالحاله .. وين ما اطقها عويه يا امي ... ما قد ابتسم ليه القدر مره ولا امبكيني قبلها عشر مرات .. كل ما اعيش الدنيا اشوفها تغرقني في همومها اكثر واكثر .. هل وصلت بي الحاله اني اتسبب في بنات خلق الله واتسبب في دخولهم المستشفيات .. ما درا سعيد انه بسببه بعد دخلت محبه المستشفى .. وبسببه دخلت ساره المستشفى .. بس هل يا ترا ساره بسببه دخلت ولا لا !! .. وهوه ما يدري شنو ياللي يستوي ..وشنو ياللي بيستوي .. وهني يقاطهم طلوع الدكتور من الغرفه ومعاه الممرضات وتتبهم روضه .. ويجي سعيد وشوق على شان يسألون الدكتور ويتطمنون على حاله ساره .. الدكتور وهو يبتسم ..: لا بسيطه يا جماعه .. شكل بنتكم متعبه نفسها في المذاكره زياده عن اللزوم .. مجرد ارهاق وبيروح .. بس اهم شي راحتها .. روضه وهيه مستغربه ..وتسأل بعباطه ..: عراق !! .. شو دخل العراق في بنتنا .. حوه عليهم .. ينانوه هم !!! وهني تبتسم شوق من خبصه روضه : يا خالتي ارهاق .. ارهاق .. موب عراق . تعب يعني تعب .. وهني تحط روضه يدنيها على بعض وهيه تقول ..: لحول الله .. بنات هاليومين ما تتحملن شي .. الوحده من شلت كيس بطاطس طاحت علينا في المستشفى شهر .. يعني لو تشل ياللي كنا نشله في زمن اول شنو بيستوي عليهم .. وهني تلتفت روضه في الدكتور وهيه تكمل هذوها وخربيطها ..: تصدق يا دكتور انا كنا نشل يواني ابو شاور (خيش الرز) ..على ظهورنا . .. وعمرنا ما قد دخلنا المستشفيات !!! وهني تقاطعها شوق ..: لا امبين .. عيل ليش تشتكين من ظهرج كل ليله .. وتقولين ليه حطي لي من الفكس !!! وهني تحط روضه يدها على ظهرها وهيه تقول ..: تصدقين .. والله انه ظهري يعورني من شل ساره يوم في البيت .. وهني يضحك الدكتور وهو يقول : هاهاهاها.. يا الوالده ..ارهاق يعني تعب .. وتعب موب بدني .. يعني موب شغل .. تفكير ودراسه .. وهذا يتعب اكثر من الحركه والشل .. روضه وهيه بدت تحمر عيونها ..وبدت تتمتم وهيه مصعبه ..: ولدتك ينيه .. .. انا بعدني في عز شبابي ويا راسك .. بس شوق غطت بصوتها على صوت روضه لانها تعرفها ما تحب احد يكبرها .. وبدت تكلم الدكتور وتسأله وشغلت الدكتور عن لا يسمع هذوا روضه ..هني قلب سعيد وجه وطلع من عند الدكتور في الوقت ياللي شوق بدت تتبعه بنظراتها .. وروضه تكمل هذوا وكلام عند الدكتور .. وهني يقاطع الدكتور حبل افكار شوق وهيه تتبع سعيد بنظرها وهو يقول ..: يا جماعه .. أنتوا مكبرين السالفه وهيه ما تسوى... وبنتكم ما فيها غير العافيه .. واصلا لو ما جبتوها للمستشفى بتكون بخير .. كل ياللي تبيه انها تستريح .. ولا تفكر كثير .. هذا كل شي ... بعد ما تطمنت شوق على ساره طلعت تدور على سعيد ياللي طلع ولا تدري وين اختفى .. كانت تدور عليه ولا سعيد كان جالس في وحده من الحدايق يفكر .. دخلت عليه امه الحديقه وجلست جنبه وهيه تكلمه .. شوق وهيه تشوف سعيد ياللي يدور في السما على شي .. : سعيد .. شنو فيك .. ما عهدتك ضعيف وتتأثر بسرعه .. وين قوتك .. سعيد وهو يلتفت على امه وهو الحزن طالع من عيونه ..: امي .. مهما بلغت قوه الانسان .. لازم في يوم يضغف .. وكثر الضرب يا امي يفكك الحام .. وانا يا ما ضربني الزمن .. بس من زمان ما كان عندي شي اخسره.. كنت بدون اي شي .. لا اهل ولا اقارب .. ولا حتى شي اخاف اخسره .. وهذا كان سبب قوه ليه .. بس الحين صار ليه اهل احبهم ويحبوني .. صار ليه قرايب ياللي اخاف عليهم .. ويخافون عليه .. وفي الاخير اتسبب انا في حزنهم وتعاستهم .. وتسأليني اخر يا امي وين القوه .. وش بقي ما سويته في مطر واهله .. كنت السبب في بلاويهم كلها .. يا امي انا ويهي ويه كره وشقا لهم .. شوق وهيه تقاطعه ..: بسم الله عليك .. لا يا سعيد .. عمرك ما كنت ويه شقى على احد .. سعيد وهو يقاطعها ..: وشنو تسمين ياللي يستوي لهم من يوم حادث خليفه !!!!!!! هني سكتت شوق واثرت الصمت لانه كلام سعيد فيه اشياء هيه بورحها تحسها ... وكانت تتمنا من سعيد انه يقويها على الدنيا .. بس الظاهر انه سعيد بورحه همومه تكفيه .. وخاصه انه بدى يتعب نفسيا من ياللي يتسوي .. وهني يقاطع شوق صوت سعيد وهو العبره تخنقه وهو يقول ..: ما اقدر اصبر لين ننتظر وننتقل من بيتنا يا امي .. والله اني موب مرتاح .. وبد الهم صار ليه عشره ... شوق ...وهيه تحط يدها على كتف سعيد ..: خلاص يا سعيد .. لا تلوم بعمرك .. انشاء الله كل شي بيتصلح من يرجعون مطر والباقين .. واناان شاء الله من بكره برتب في بيتنا وخلنا في اليوم ياللي يوصلون مطر وخليفه ننتقل لبيتنا انا وانته .. شنو رايك ..!!؟؟ سعيد ..وهو يبتسم بتمثيل .. : ان شاء الله .. في هذا الوقت .. كانت ميثا عند بنتها ساره .. وتمسح على راسها وتكلمها ....تنادي عليها .. عسى بس ساره ترد عليها .. بس وجه ساره كان جدا شاحب .. والتعب ماخذ قوتها .. وخاصه انه في الفتره الاخير معتزله العالم ..والجلوس بروحها والتفكير ماخذ كل وقتها ... في هذي اللحظه بدت ساره تبطل عيونها .. اول ما بطلت عيونها بلا بعالم غير العالم ياللي غمضت اخر مره عيونها عليه .. والا بدنيا غير الدنيا ياللي كانت عايشتها .. ولا بصوت دافي وحنون بدى ينادي على ساره .. ميثا وهيه تنادي ..: ساره .. ساره فديت قلبج .. تسمعيني .. وهني تلتفت ساره ولا بامها جنبها وهيه تنادي عليها ..وتلتفت ساره وهيه تتكلم ..: هاه... امي .. وين انا .. وشنو هالمكان .. وهني تحاول ساره انها تقوم .. وتسير ميثا تساعد بنتها على انها تقوم من مكانها ..وهيه تسندها بيدها بعد ما عطت ميثا يدها على ظهر ساره وقومتها .. ميثا ..وهيه تدمع عيونها ..: انتي في المستشفى ... اغمي عليج يوم كنا نكلمج يا ساره .. شنو ياللي يعورج يا ساره .. شنو ياللي ماخذ قلبج يا بعد قلبي ........ ساره وهيه تهل دمعتها .. : ما فيني شي يا امي .. بس تعبانه .. تعبانه ولا ليه نفس اقول شي .. ميثا وهيه تحضن ساره بعد ما تمايلت ساره على امها تبا امها تحضنها ..: ما تشوفين شر يا بعد قلبي .. وانشاء الله شده وبتزول .. "انما بعد العسر يسرا " .. .. ساره ..وهيه تدمع وتبكي في حضن امها ..: صدق الله العظيم .. هني دخلت روضه وهيه تبتسم على ميثا وساره .. روضه وهيه تبتسم ..: اها .. كيف الاموره الحين !! .. ابتسمت ساره في وجه يدتها وقالت وهيه تهل دموعها ..: بخير يا يدوه .. بخير الحمد الله .. روضه وهيه تجلس جنب ساره ..: عيل يالله جلي نفسج وخلينا نسير للبيت .. ساره وهيه تمسك دموعها وتمحهن بيدينها ..: وكيف وصلت انا هني !! ... روضه ..وهيه تبتسم ..: والله طرتي يا بنت مطر .. كيف يعني وصلتي هني .. اكيد بالسياره وصلتي ...هاهاهاها ساره وهيه تبتسم بتمثيل ..وهيه تكمل مسح دموعها ..: لا .. لا .. ما قصدت جيه .. انا قصدي .. لا يكون انتوا شليتوني . مشاء الله عليه .. ثجيله .. روضه وهيه تضحك ..: عيل يوم انتي ثجيله .. شنو بقيتي للبنات ..هاهاهاها..لا يا ساره .. ما شليناج .. سعيد هوه ياللي شلج .. هني بطلت ساره عيونها وهيه تقول : سعيد !!!!!!!!!!!!!!! ... ميثا وهيه تحاول انها تغير الموضوع .. : يالله خلونا نسير للبيت .. وهني ابتسمت ساره .. لانها عرفت انه سعيد ما تركها وقت ما احتاجت له .. وانه لو ما كان يعزها .. ما كان عرف بكل شي استوى لها .. وهذا اقصى شي تتمناه في هذي اللحظه .. كل ياللي تتمناه واتريده هيه انها تشوف سعيد .. عمر المحب ما يمل من محبوبه .. حتى ولو جفاه .. حتى ولو تركه .. بس حزنها انها خسرته كرفيق لدربها في الحياه .. هذا متعبها ومرهقها .. ولا تتخيل نفسها مع ريال ثاني ..وخاصه انها تحبه لحد الجنون ... وهني تحاول ساره انها تقوم وتساعدها ميثا وروضه على انها تقوم من فراشها .. ويمشون بساره لبرا في اللحظه ياللي شوق انتبهت انه ميثا والكل طلع .. شوق وهيه تضرب سعيد على كتفه بضربه خفيفه ..: يالله يا بوعسكور .. تراه طلعت ساره والكل . هني ابتسم سعيد لانه ارتاح يوم شاف ساره بخير وتمشي بورحها.. رغم انه روضه و ميثا بس ماسكين يدينها ..وعلى طول ربع للسياره يقربها على ساره والكل .. ركبت ساره ومن عندها وساروا للبيت .. كان طول الطريق ساره تملى عيونها ببطلها ياللي ما تركها حتى في الفتره ياللي كانت تعاني بسببه .. كان سعيد يحس بنظرات ساره له .. بس كان مثل عادته ما يناظر لورا .. وهني حطت ساره راسها على كتف امها وابتسمت وهيه تملى عيونها بسعيد ياللي بدت تحبه اكثر واكثر .. حتى بعد الجفى ..حتى بعد تركه لها .. بدت تنزل دموعها وهيه تشوف الانسان ياللي تحبه معاها حتى في اصعب اللحظات .. حتى ولو تركها ولا يباها .. بس موقفه كريال وشهامته كانت غايه ما تتمناه ساره .. يكفيها انه تشوفه .. وتملى عيونه ابشوفته .. وبدت ساره تسرح وتتأمل انه سعيد راح يغير رايه .. ويكون لها .. وبدت الامال تعود لساره .. ووصل الكل لللبيت .... وسار الكل يودي ساره لغرفتها .. وبدوا يسولفون معاها بعد ما انسدحت ساره في سريرها ..والكل حولها جالسين يسولفون .. .. ما عدى سعيد ياللي كان جالس في الصاله يشوف التلفزيون وعقله في مكان ثاني .. مر الوقت لين قامت شوق وحبت راس ساره وهيه تقول لها ..: ما تشوفين شر يا بعد قلبي .. وبخليج الحين تنامين .. وعن السهر ...!!.... ساره ..وهيه تبتسم ..: وانتي من اهله .. ان شاء الله .. ما راح اسهر ..خلاص .. وهني تقوم روضه وتحب راس بنتها وتطلع ...ما بقى في الغرفه غير ميثا وساره .. وهني مسكت ميثا يد ساره وبدت مسحها وهيه تكلم بنتها .. ميثا وهيه نظرتها فيها جديه ..: سمعيني يا ساره .. ساره ..: نعم يا امايا... ميثا ..وهيه تحط يدينها الثنتين على يد ساره وتدلك بحنان يد بنتها ..: سمعيني يا بنتي .. انتي موب صغيره .. وما شاء الله .. صرتي كبيره .. والف واحد يتمناج .. هني نزلت ساره راسها ..وعيونها في الارض ... ميثا وهيه تكمل كلامها .. : الكل يا بنتي يدري من البدايه انج تحبين سعيد .. وانه كل ياللي يستوي فيج .. من تفكيرج فيه .. وانه قال لج انج ما تنتظريه .. صح ولا انا غلطانه !!؟؟؟ ساره وهيه بدت دموعها تنزل ...وهني مسكت ميثا ساره من فكها روفعتها بحنان وهيه تشوف دموع ساره تنزل ..وبدت تمسح الدموع وهيه تقول لها بكل حنان ..: ميثا .: سمعيني يا بنتي .. عمر الدنيا ما جمعت بين احباب والا وفرقتهم .. والدنيا تجمع وتفرق .. وعرفي يا بنتي انه مهما جمعتج الدنيا بغالي .. بتاخذه عنج .. ولازم تتعلمين انه الدنيا يبالها صبر .. وموب كل شي تحلمين فيه راح يتحقق .. ساره وهيه تدمع عيونها ..: ادري يا امايا .. ميثا وهيه تبتسم بحنان ..: عيل يا بنتي يوم تدرين .. ليش مسويه بنفسج كل هذا .. وهني غرغرت ساره بالبكي وهيه تقول ..: يا امي ما توقعت انه كل هذا بيستوي فيني .. ما عرفت نفسي بدون سعيد .. امي والله اني موب بيدي .. ابا من يفهمني .. ابا من ينبهني .. وهني تقاطعها ميثا بصوت حنون وهيه تقول ..: يا بنتي .. انتي نسيتي كل شي يوم شفتي سعيد .. انا ما غفلت من نظراتج له في السياره .. انتي يا ساره نسيت حتى غذابج من شفتيه .. يا بنتي .. انا ما ابا احطمج ولا اكسر من عزمج .. بس يا بنتي البنادم ما يبيع نفسه على احلام يمكن بالمره ما تتحقق .. حلو يا بنتي الامل .. حلو انه الانسان يبني امال .. بس ما تكون شي من الخيال .. يا بنتي الانسان يعيش الواقع ويبني عليه امال .. موب يتم في عالم احلامه ويترك الناس تحققله اماله .. والدنيا يا بنتي ما تكون السعاده ابها بوجود شخص واحد وبس .. يمكن انتي تشوفين سعادتج عن سعيد .. بس يا بنتي ما شفتي سعادتج عند اهلج .. ما شفتي حياتج عنده في المستقبل كيف بتكون .. يمكن يتغير سعيد .. يمكن انتي تتغيرين .. يمكن ما تليقون ببعض ... وهني بدت ساره تتنهد يوم تشوف انه كل ياللي كان من امال انبنا في السياره انهدم بكلام امها .. بس التزمت الصمت وبدت تهل دموعها وهيه تبكي بتنهدات متقطعه .. هني بدت ميثا تكلم نفسها وهيه تشوف ساره تبكي ... وحطت ميثا يدين بنتها علىقلبها وهيه تقول لنفسها ..: اسمحيلي يا ساره .. ادري اني طعنتج بكلامي .. وادري انج تنزفين .. بس والله يا بنتي انه لمصلحتج .. ما اباج تعيشين الوهم .. ما اباج تعيشين احلام .. وتقتلب لج لكوابيس ...وتعيشين العمر كله في حزن .. وهني قطع تفكير ميثا صدى صوت ساره وهو يغرق في البكي ..: نصحيني يا امي .. شنو اسوي .. شنو اسوي على شان ما اتم على هذي الحاله ..!! ميثا وهيه تتقرب من بنتها وهيه تحضنها بحنان في اللحظه ياللي رمت ساره برسها في حضن امها الحنون وهيه تبكي ..: والله يا بنتي ما ادري وش اقولج .. بس ما فيه امل الا انج تعيشين امل ثاني ما انسان ثاني .. وهني ترفع ساره راسها وهيه لين هذيج الساعه في حضن امها ..: كيف يا امي .. !!.. انا موب فاهمه شي .. وهني رفعت ميثا ساره من حضنها وبدت تكلمها بجد .. : ساره .. سمعيني يا بنتي .. والله ما قلت انا هذاك الكلام على شان احطمج ولا شي .. بس ما اباج تعيشين الاوهام واشياء انتي تحلمين فيها .. ولا على شان افتح معاج هذا الموضوع .. ساره وهيه مستغربه لانه كلام امها بدى يكون الغاز ...: كيف يا امي ما فهمت شي ... ميثا ..وهيه عيونها في عيون ساره ..: ساره .. تعرفين ام مبارك .. وولدها احمد !! ساره وهيه ما عندها خبر عن الكلام ياللي بيستوي : ايوه .. اعرفهم زين .. شنو فيهم .. ميثا ..: سمعيني يا ساره .. ام مبارك كلمتني فيج .. وتباج لولدها احمد .. شنو رايج ...!! وهني راتمست الصدمه في وجه ساره وهيه مش عرافه شنو ياللي بدى يستوي في داخلها .. كان خليط من الحزن واليأس .. خليط من ونه ودمعه التزمت الصمت واندفنت في قلبها .. كانت مثل الصدمه لها وهيه تتلقى هذيج الكلمات .. بس صدى صوت ميثا بدى يغطي على افكار ساره وهو يقول لها .. ميثا وهيه تقطع حبل افاكر ساره ...: ساره ..سمعيني .. فكري على راحتج .. وام مبارك تقول رايج هوه المهم .. وسمعيني يا بنتي .. تبين تنسين سعيد .. لا تنتظرين الزمن ينسيج اياه ...انتي ابتدي دوم بالخطوه الاولى .. تبين تنسين سعيد مثل ما نساج .. عيشي حياتج .. وسعيد لاهو اول ريال ولا اخر ريال .. ومشاء الله عليه .. احمد شاب ولا ينعاب .. اخلاق .. وزين .. وطيبه .. حتى اهله نعرفهم زين.. واخوه مبارك الله يرحمه كان رفيج ابوج في الشغل .. وابوج دوم يمدحه .. يقول عنه انه شاب مدينه وعارف ربه .. الشجره الزينه يا بنتي ما تثمر الا الزين .. في الوقت ياللي ميثا تتكلم عن احمد وعن اخلاقه وطيبته ووصفه ..كانت ساره اثر الصدمه مرتسم في عيونها .. كان اثر الصدمه ينطب ابها شفاتها ياللي بدت ترتجف موب عارفه شنو تقول ولا شنو تنطق .. بدت ساره ترتجف وهيه تحس بالعالم كله منحولها يسودّ ... حست انه الدنيا كلها حر .. انتها الاكسجين من الهوا .. بدت تحس بضيقه .. باختناق .. بدت تعرق وهيه تحس بالدنيا برد ... بدت مشاعرها تضطرب .. بدت تفكر وتسأل نفسها .. ساره وهيه تسأل نفسها وهيه مضطربه كل مشاعرها ..: البنت لا من جاها خطّيب تفرح ولا تشيلها الدنيا من الفرحه .. ليش انا ياللي احس بالدنيا سودا في عيني .. ليش ما افرح مثل باقي البنات .. يمكن يكون خطوبتي من احمد سبب لنسياني لسعيد .. يمكن انساه وحتى سعيد يساعدني على اني انساه يوم يعرف اني انخطبت .. بدت ساره تسعر وتفكر لين قاطعها سوت امها ميثا وهيه تقول هلا .. شنو قلتي يا ساره !! .. شنو رايج ..!!! ساره وهيه ترجع من اثر الصدمه بس بسرحان غريب ..وبذبول في الصوت ..: اه .. شو ... ما ادري والله يا امي .. فاجأتني .. ميثا وهيه تدري انه ساره مصدومه ..: ادري اني فاجأتج يا ساره .. المفروض اني ااجل الموضوع لين انتي نفسيا تكونين مستعده .. بس يا ساره حسيت انه هذا الموضوع راح يساعدج علىانج تنسين سعيد .. وتعيشين حياتج مثل اي بنت عاديه .. ما ابالج يا بنتي العذاب وانتي بعدج صغيره ... ساره وهيه تنزل راسها ..: ادري يا امي ... بس هل ابوي يدري بالموضوع .. ميثا ..وهيه تبتسم بتمثيل على شان ساره ما تنزعج..: لا يا بنتي .. انا ما خبرته بالموضوع .. لانه ام مبارك تبي رايج اول شي .. وبعدها يتقدمون لخطبتج رسمي .. وهيه تقول خذوا راحتكم .. لين يجي خليفه وابوج من السفر .. ساره وهيه تتمتم ..: خليفه ..وينك يا خليفه ما تجي وتشوف حاله اختك من بعدك كيف صارت .....وينك يا اخوي ما تجي!!! .. والله محتاجتك اكثر عن اول .. وينك يا خليفه !!!.. وينك !!!!! وهني تقاطع ميثا حزن ساره وشوقها لخليفه ..: انتي خذي راحتج يا ساره ولا تستعجلين .. ولا تغصبين نفسج على شي ما تبينه .. وتراه مثل ما يقولون .. الزواج قسمه ونصيب .. ولو نصيبج في انسان .. صدقيني يا بنتي بتاخذينه .. ساره ..: ادري يا امي .. وهني انفجرت ساره تبكي .. وارتمت في حضن امها ..في البدايه انصدمت ميثا من حركه ساره .. بس بحنان الام وبطيبتها حظنتها بيدينها كنه ساره طفله ام 4 سنين .. وبدت تكلمها بكل طيبه وحنان .. ميثا ..وهيه تحاول تهدي ساره ..: ادري يا ساره انج تحبينه ..وصعب عليج فراقه .. بس هذا قدرج يا بنتي .. لا تعيشين الحزن مرتين يا بعد قلبي .. ساره ..وهيه تبكي ..وفي حضن امها ..: لا يا امي .. أنا ما ابكي على سعيد .. لاني اعرف انه عمره ما راح يكون ليه .. انا ابكي غياب خليفه ياللي طال .. امي والله اني اشتقت له .. ابا اشوفه .. ابا اجلس معاه .. وحشتني سواليفه .. اشتقت لخرابيطه وكلامه ياللي ما يوقف .. امي وين كنا وين صرنا .. اشوفنا يوم بعد يوم نتفرق .. لي متى بنتم على هذي الحاله .. متفرقين ولا نشوف بعض .. هني ايقضت ساره بكلامها حب وحنين .. شوق ولهفه في قلب امها .. كانت مها تخفي الشوق في خفايا ضلوعها وتحاول انها تلهي نفسها بامور البيت والحياه عن لا تفكر في ايام خليفه ياللي كان عايشهن معاهم .. وين هذيج الايام .. كانت الضحكه منوره البيت .. كان صدها ينتشر في كل ركنه .. كان منور البيت بوجوده .. بس كلام ساره اثار كل شي .. وهني بدت ميثا تبكي وهيه تحضن ساره وهيه تبكي .. عرفت ساره انها ما كان لازم تقول هالكلام .. حتى ولو كان صدرها ضايق من الحاله ياللي عايشتها ...لانه قلب امها ما عاد يتحمل اي شي .. مرت فتره على ميثا وساره وهم يبكون .. لين هدأت احوالهم .. وطلعت ميثا من الغرفه وهيه تاركه ساره تفكر وتتعمق في القرار لانه اصعب قرار تتخذه ساره في حياتها ........... في هذا الوقت .. وفي لندن بالتحديد.... ما عياده لندن كلينك .... مطر وحميد وخليفه في الغرفه يتابعون قناه (ال . بي . سي).... وخليفه بدى يمل ... مطر وهو يشوف خليفه مال ..وبدا يسأله ..: خليفه وش فيك .. اشوف تنفخ كثير .. خليفه وهو جالس على الفراش .. وحالته بدت تتحسن ..: والله ضيق يا ابوي ... ما فيه شغله ..كله جلسه في هالغرفه .. حميد وهو يضحك ..: هاهاهاها.. ضيق من الغرفه ولا المزيون ما دق عليك تلفون .. هاهاهاها مطر وهو يناظر حميد بنظره غريبه ..: لا والله .. مزيون في عينك انته واياه .. وش ذا الرمسه عندكم !! .. اشوفه السالفه فيها مزايين .. هني حميد سكت .. وبدى يخاف من نظره مطر .. في الوقت ياللي خليفه بدى يخز ابوه بعيونه وهو يبتسم .. مطر وهو ينتبه لنظره خليفه له مع طقم السنان معاها .. مطر وهو يخز خليفه بعيونه ..: علومك انته الثاني على شنو تطلّع !! ... خليفه وهو يحرك حيانه ..ويبتسم بطقم الاسنان ..: يا عيني على الاخلاص .. اونك انته الحين ما تكلم مزايين !!! مطر وهو يحتشر ..: ومن يقول لك اني اكلم مزايين .. انا ريال متزوج .. واصون العشره .. حميد ...وهو يضحك ..: وما فيه احد شكك في كلامك .. هاهاهاهاها خليفه وهو يضحك ...: هاهاهاها.. لا فيه شكوك وشهود اعيان بعد .. هاهاهاها مطر وهو بدى الارتباك عليه ....: لا والله .. اي شهود ..شكلك انته المغذي مأثر عليك ... خليفه وهو يضحك ....: هاهاهاها.. وشنو فيك تنتفض يا الشيبه .. .. مطر وهو بدى يحتشر ..: شيبه !! .. اشوفها نغمه يديده يا خلوف .. شنو وراها .. خليفه وهو يقلب عيونه لبعيد ..: لا ما شي .. ما شي .. مطر باستنكار ..: لا والله .. !! .. وليش تقلب عيونك كنك بومه مخنوقه .. حميد وهو يقاطعهم ..: يا اخي خليفه .. خبره وفكنا .. نبي ترانا افلوس من هالشيبه ..هاهاهاهاها مطر وهو يقلب عيونه بين خليفه و حميد ياللي كانوا مثل التوأم يوم يتكلمون .. والاشاير بينهم ما توقف وفاهمين بعض من دون اي كلام ... مطر وهو يسأل ..: يخبرني على شنو .. تراني بناولكم بهالعقال لو ما تكلمتوا .. وش عندكم !!! خليفه ..وهو يضحك ..: هاهاهاهاها.. بل عصب الشيبه .. مطر وهو يوقف بالعكاز ..: شيبه في عينك .. سود الله ويهك من صبي .. قول ولا تراني بعطيك بهذي الحصى على راسك .. خليفه وهو يضحك ..: هاهاهاها.. خلاص خلاص بقول بقول .. بس لا تعصب ... مطر ..وهو يبتسم ..: عيال هالوقت ما يجون غير بالعين الحمرا .... خليفه .. وهو يضحك ...: شنو حركات الشباب ياللي تسويها عند الممرضات يا بوخليفه !!! مطر وهو ينكر ..: اي حركات !! خليفه وهو يضحك ...وعيونه في عمه حميد ..: هاهاهاها.. قلت لك يا حميد ..ما راح يقول .. وراح ينكر .. وهني يوقف حميد ..اونه عصب ..: عمك حميد لو سمحت .. خليفه وهو مستغرب ..: بل .. خاين .. شنو فيك انقلبت عليه .. مطر وهو يبتسم ويجلس على الكرسي ....: لانه في صف اخوه .. مش في صف ولد اخوه ... خليفه وهو اونه المظلوم ..: بل .. والله خيانه يا عمي حميد .. ما هقيتك تضرب في الظهر .. حميد وهو يضحك ..: هاهاهاها.. اضرب في كل مكان انا .. ما همني .. المهم اني ارتاح نفسيا واخذ فلوس من هالشيبه ولا بخبر ميثا عليه .. هاهاهاهاها.. خليفه وهو يضحك ..: .. يعني سويت عليه انقلاب .. هاهاهاها حميد وهو يحط يديه ورا ظهره مثل الحركات العسكريه ..: اي نعم .. بالروح بالدم .. نفديكي يا فلوس يا اغلى من النفوس .... .. هاهاهاها وهني ضحكون خليفه ومطر ويتبعهم حميد ياللي ضحك وبعدها جلس ... خليفه .. وهو يلعب بحيانه على حميد وهو يقول له ..: خلاص .. انقلاب .. وانا بنقلب بعد .. مطر .: زين . اقلب عليه .. اقلب عليه يا خليفه .. حميد .وهو مستغرب من كلام مطر .: بل .. شنو فيك قلبت عليه انت الثاني بعد !!!! .. مطر ..وهو يضحك ..: هاهاهاها.. عنبو .. تقلب على ولي العهد ولا اقلب عليك .. ما يصير يا حميد ما يصير الله يهديك ..هاههاهاهاهاها خليفه ..وهو يضحك ويرفع ايده فوق مثل المنتصر ..: عاش بابا ..هاهاهاهاهاها مطر وهو يعصب بتمثيل ....: باب يطبع على رقبتك ويقصفها .. شنو بابا بعد .. خليفه وهو يمسك اللحاف ويغطي نص وجهه ويطلع عيونه اونه خايف : بس انا مريض يا بابا .. والمفروض تدلعوني .. مطر وهو يضحك ..: هاهاهاهاها.. ما كفاك دلع الممرضات لك يا خليفه .. اشوفهن تجيت تسوين عندك حظور وغياب .. بسك .. شنو لك بدلع الشيبان بعد ..هاهاهاهاا خليفه وهو يربي الغطى ويطلع طقم الاسنان ويلعب بعيونه وحيانه ...وهو يقول ..: اي والله.. يجون سيون حضور وغياب .. بس موب على شان خاطري .. على شان خاطر عيون ناس ثانيه .. هني قلب مطر نظره صوب حميد ولا بحميد حاط يده على فمه ويلتفت بعيد عن وجه مطر .. وهني يمسك مطر العصى يحاول يضرب حميد ابها بس حميد ربع من فوق الكرسي وهو يضحك .. ويكمل مطر الكلام : سود الله ويهك يا حميد .. قلت لخليفه عن ياللي يستوي ... !!! خليفه وهو يضحك ..: هاهاهاها.. ايوه قالي .. والحين تلفون واحد مني راح يخلي الوزاره العاليا في بيتنا تنتقل هني .. وانته تعرف الباقي .. من محاكمات .. وقضايا .. ومحامي الدفاع .. وسجن .. وعقوبات .. و ووووو مطر وهو يبتسم واونه يقردن في خليفه ويتقرب من ولده..: خليفه .. انا ابوك .. وانته ما تبا لابوك انه يتلعوز عند عيوزك .. خليفه وهو حاط يدينه على بعض اونه يدلع وتميايل وهو رافع راسه ....: لا .. لا .. ما يخصني .. حتى اني بقول لها انك قلت عليها "عيوز" .. يعني ياللي يسمعك بيقول انك اصغر عن امي باربعين سنه .. هاهاهاهاهاها.. ما كنك شايب .. هذا غير يوم تتركني وتجلس عن الممرضات في الاستقبال ياللي في اول القسم .. اونك ياي عندي تعالجني .. انته ياي تملى عيونك .. ما كفاك زمان الشباب يوم تسّير ولا خليت بنت في الحاره ولاماسح شاعرهم .. هاهاهاهاهاها مطر وهو يضرب خليفه على راسه بضربه خفيفه .. ويجي حميد يجلس على الكراسي ..في الوقت ياللي قال مطر ..: شيبه في عينك .. انا بعدني شباب .. ومن حقي اني استمتع بشبابي ... هني ضحك خليفه وطاح السرير يضحك بصوت عالي ...استغربوا مطر وحميد ضحك خليفه .. ولانه المفروض يضحك بطريقه عاديه .. بس ضحكته كانت عاليه .. وفيها شي مخبيه خليفه من ورا هذيك الضحكه .. مطر وهو يضحك ..:: هاهاهاها.. شنو يضحكك يا خليفه .. ضحكنا معاك .. حاولوا حميد ومطر يفهمون سر انفجار خليفه من الضحك .. بس ما فهموا شي لانه خليفه ضاع صوته في وسط الضحكات وهو يحاول يفهمهم سبب ضحكه .... بس ما ينفهم شي منه .. حميد وهو مستغرب ..: خليفه .. والله ما فهمنا شي منك ... شنو عندك .. شنو روراك .. خليفه وهو يحاول يمسك عمره من الضحك .. بس ما قدر .. وبدا يقطع بين الضحك والكلام وهو يقول ..: هاهاهاها.. ما فيه شي ...هاهاهاا.. تذكرت امي روضه وهيه تتهرب من الشيب وتبي دوم تكون شباب .. هاهاهاها.. والحين ابوي يقول نفس كلام امي روضه .. ما كنه هوه الثاني شيبه بعد .. هاهاهاهاها.. هوه وامي روضه يدورون الصغر .. بس ما يندرى لين وين بيوديهم هالصغر .. هاهاهاهاهاها وهني انفجروا حميد ومطر لانه كلام خليفه كان صح مليون في الميه .. وخاصه انه ولا واحد جت على باله سوالف روضه .. وهني ضحك مطر وهو يقول ..: اي والله .. ما جت على بالي .. شكله مرض وانتشر بيناتنا .. هاهاهاها.. تصدق .. ذكرت سالفه الصندوق .. هاهاها.. الله يذكرج بالخير يا روضه.. ماخلت شي في البلاد ما شلته لنا .. وخاصه انا بتلاشنا بالصندوق في المطار .. لين واحد من الشباب الله يطور بعمره سعادنا فيه .. واجر لنا سياره تنقله لنا .. هاهاها .. من هذاك الوقت لين الحين والصندوق عامر .. يعيشنا ويعيش جيرانا.. هاهاهاها خليفه وهو يضحك ..: بل بل بل ..كل هذا وانا ما ادري عنه !! .. وين امي روضه ما تجي تسمع كلامك ..هاهاها وبدت الضحكات بين خليفه ومطر وحميد تبعد عنهم الروتين ياللي عايشنه من مده .... لين فجأه سمعوا طرقات خفيفه على الباب ... حميد ..وهو يمسك نفسه من الضحك ..: حياك ... اوه .. نسيت .. "كم ان " .. وهني يدخل عبدالله لغرفه خليفه ..رغم انه الوقت متأخر بالليل ... خليفه وهو يبتسم .. : مرحبا والله ابوحميد .. عبدالله وهو يبتسم ..بعد ما دخل : الله يرحبك على فضله يا بو مطر ... ويسلم عبدالله على حميد ومطر وعلى خليفه .. مطر ..وهو يبتسم .: كيف الحال يا ابو حميد .. عبدالله وهو عيونه في مطر بعد ما سلم على خليفه ..: سرك الحال يا ابوخليفه ..وش مسوي الحين .. انشاء الله احسن .. مطر وهو يبتسم ..: والله يسرك الحال .. سوينا فحوصات يبشرونا بانا راح نعق الشيب ورانا بعد مده بسيطه ... * مطر في الوقت ياللي كان خليفه يتعالج فيه كان مطر يسوي فحوصات على شان يقدر يمشي طبيعي من دون الاستناد على العصا.... وكل ياللي نصح فيه الدكتور انه مطر يقوم بتماريين رياضيه معينه لين تقوا الاعصاب عنده ويقدر يمشي بدون الاستناد على العصا .. * حميد وهو يبتسم ..: الشيب وراك وراك .. والعصا بتم عندك .. لين انشاء الله تقدر تسير بدون العصا .. عبدالله وهو يبتسم ..: انشاء الله قريب راح تفتك منها يا بوخليفه .. مطر ..: انشاء الله .. وهني يقرب مطر بعبدالله في الكرسي ياللي كان جنبه .. ويقعد حميد عند خليفه في السرير .. ومطر جنب عبدالله ... مطر وهو يلتفت في عبدالله يسأله ..: هاه يا عبدالله .. وش قالوا الدكاتر في اختك .. عسى خير ... .." يتبـــــــــــع ".. ...تحيااااتي... **أريام** | |||||||||
|
|
|
06-20-2006, 03:09 AM
| رقم المشاركة : 182 (permalink) |
|
| عبدالله : والله الحمدلله .. بعد الفحوصات ما لقوا شي غير طبيعي .. يمكن عندها سوء تغذيه .. وما تاكل شي صحي .. هذا ياللي يتوقعونه .. بس يقولون لازم تستمر على الدواء ياللي اعطونا اياه .. وعلى اكل صحي .. هذا كل شي ... مطر : الحمد لله ما دامت هيه بخير ولا فيه شي كبير .. عبدالله ..: نعم الحمد لله على نعمته .. وكيف خليفه الحين ..متى راح يرخصونه .. حميد : والله بعدهم .. يقولون يمكن بعد اسبوع لو شافوا حالته تحسنت يخلونه يمشي ويطلع للحديقه .. خليفه وهو يبتسم ..: لا والله .. وعندكم هالعلوم الطيبه وساكتين ما خبرتوني فيها ... حميد وهو يلتفت في خليفه ..وهو يبتسم .: لانا لو خبرناك بتم تحن وطن على روسنا لين نطلعك .. ونحن ما فينا على عوار راس .. هاهاهاها وهني يضحك عبدالله ومطر .. في الوقت ياللي خليفه طلع بوزه شبر ... عبدالله وهو بعد ما ضحك ..: ان شاء الله بتقوم بالسلامه يا خليفه .. وانشوفك في البلاد سالم غانم .. خليفه وهو مستغرب ..: عبدالله .. من كلامك امبين انك مسافر قريب .. عبدالله وهو يبتسم لخليفه ..: اي والله نعم .. طالعين الليله لاثينا .. وبعدها بنسير نيوزيلاندا .. .. كشته بسيطه قبل لا نرد للبلاد .. خليفه وهو اونه متحسر ..: يا حسره عليه .. مقابل شيبان هني واربع جدران .. وانته بتكون تتكشت .. وين الصداقه يا عبدالله ..وين المخوه .. كنها مخوه بوش ... عبدالله وهو يضحك ..: والله هذي هيه المخوه يا خليفه .. يقولك المثل عط كل دار سنتها .. وهني الدار ما فيها ملازيم يا خليفه .... وبسك من مقابل وجهي .. صار لك شهر وانا عندك .. اشوفك ليل ونهار .. مليت منك واكيد انته مليت مني ... .. بسير اشوف ليه وجوه ثانيه .. هاهاهاها مطر وهو يدش عرض ..: افا يا عبدالله .. كنك مليت منا .. عبدالله وهو منصدم من كلام مطر وهو يطالع مطر .. ..: لا حشى .. حميد وهو يقاطع عبدالله .. : شنو تعني بتشوفلك وجوه ثانيه .. يعني وجوهنا موب مفاليح .. عبدالله .وهو مستغرب وعلى نياته ..: لا والله .. ما قصدت .. وهني يدش خليفه عرض ..: لا يقصد يقصد ...اعرف الريال .. وهني فهم عبدالله انه الكل يمزح معاه.. فضحك وهو يقول ..: هاهاهاها.. زين يوم تعرفني .. لو ما تعرفني بتنغش فيني .. هاهاهاها خليفه ..: سير يا عمي سير .. ملينا حتى نحن منك .. هاهاهاها وهني تقاطعهم الممرضه بدخولها الغرفه بعد ماطرقت الباب .. مطر وهو مستغرب ..: وش عندها هالعيوز الثانيه بعد !!! وهني يتكلم حميد مع الممرضه بالانجليزي ..: نعم ..خير يا الممرضه .. الممرضه وهيه تبتسم ..: لا ما فيه الا كل خير .. بس ممكن تخفون صوت الضحككم وسوالفكم شويه .. لانه الممرض في الغرفه المجاوره يشتكي من رفع صوتكم يا العرب .. حميد وهو يبتسم ..: اوكي .. ان شاء الله .. اسفين على الازعاج .. الممرضه وهيه تبتسم : لا تعتذر .. بس المريض ياللي في الغرفه المجاوره حساس شويه .. فانتوا خفوا الصوت شويه .. مطر ..وهو يبتسم ..: اشهد اني لو المستحى كان شليت له شله تخليه عمره ما يفكر يشتكي .. هاهاهاها خليفه .. وهو يلعب بحيانه ..: اونه الحين من حلات صوتك ..!!!! عبدالله استغرب كلام خليفه مع ابوه .. ما توقع انه العلاقه بين مطر وخليفه قويه لدرجه قويه .. وهذا الشي خلاه يغار ووده لو في يوم يقدر يسولف عند ابوه بكل حريه وطلاقه .. مطر وهو يضحك ..: هاهاهاها.. وليش لا .. ما تدري انه امك تزوجتني من حلاه صوتي مش من حلاه وجهي ..!!!!هاهاهاهاهاها هني ضحك حميد والكل من سوالف مطر والممرضه مستغربه تصرفهم وخاصه انهم بدوا يتكلمون بالعربي .. الممرضه ..وهيه مستغربه ..: شكلكم تحشون فيني صح !!! عبدالله وهو داش عرض ..: لا لا .. ما نحش فيج .. بس نسولف ....هاهاها الممرضه ..: ادري فيكم يا العرب .. لا من يعطيكم الواحد قفاه تشحون فيه حش ... خليفه وهو يضحك ..: بل .. تحسست هذي الثانيه بعد ..اقول يا سالي ..تراه نحن نسولف بسوالف عاديه .. وانتي مالج دخل في سوالفنا .. هاهاهاها.. بس لو يحشون فيج لا تخافين .. انا بكون في صفج .. كم سالي معانا .. مليون .. بس انتي اغلاهم .. هني ضحكت الممرضه من الخاطر .. الممرضه وهيه تضحك ..: يا ليتني اقدر اتكلم عربي .. على الاقل راح اسولف عندك اليوم كله .. سوالفك ما تنمل يا خليفه .. ودمك خفيف .. هني خليفه اونه مستحي ..: اقول سالي .. لا تقولين هالكلام قدام الشيبه .. الممرضه وهيه مستغربه ..: ليش !!! خليفه وهو يضحك ..: لانه ابوي بيخبر الحريم في بلادنا .. الممرضه وهيه تستغرب اكير ..: وشنو فيها لو خبر الحريم في بلادكم ..!!! شنو بيستوي يعني ..!!! خليفه ..وهو يضحك ..: انتي تكلمين حبيب الشعب .. وانا ليه سمعه وصيت .. يعني لو خبر ابوي انه فيه بريطانيه تغازلني .. راح تغتالينج بنات البلاد .. هاهاهاهاهاهاهاها وهني على طول طلعت الممرضه من الغرفه وهيه مصدقه .. عبدالله وهو يضحك .: هاهاهاها.. بل عليك يا خليفه .. زيغت الحرمه .. الحق عليها قبل لا تتصل بالشرطه واتقول عنك ارهابي .. هاهاهاهاها خليفه وهو يضحك بس بكل ثقه ..: لا ما عليك منها .. بتسير تزقر ليه البقره مارقريت .. عبدالله وهو مستغرب ..: منو بعد هذي !! خليفه وهو يضحك ..: هاهاهاها.. البقره الضاحكه .. هاهاهاها هني تدخل سالي ومعاها مرقريت .. بس صوت ضحكه مرقريت وصل قبل دخولها .. هني التفت عبدالله في خليفه وهو يضحك ..: ابشر .. وصلت بقرتك .. هاهاهاها.. اشهد انه جنون البقر بدى من قسمكم .. هاهاهاهاهاها وهني يضحك حميد ومطر وخليفه على كلام عبدالله .. وتجي سالي ومرقريت وتسولفن عند خليفه والكل لفتره بسيطه وتطلعن بعدها .. في هذي اللحظه يقوم عبدالله من مكانه وهو يسترخص .. عبدالله وهو يبتسم .: من رخصتكم يا جماعه الخير .. شكلي طولت على اهلي .. وهني يقوم مطر ويتبعه حميد ... مطر وهو يبتسم ..: والله لو ما عندك فريقك يا عبدالله .. والله ياللي ما ارخصنا بطلعتك منا .. بس شنو انسوي .. عبدالله وهو فرحان بانه عرف مطر وحميد : والله حتى انا يا بو خليفه .. بس ان شاء الله بنتلاقى في البلاد ..وفي دار بو خليفه ياللي احسن واشرف من هالدار .. مطر ..وهو يبتسم ...: اي والله .. حميد وهو يسلم على عبدالله ..: الله يحفظك يا ابو حميد .. والسموحه كان سمعت منا كلمه مني ولا مناك .. ترانا نسولف كثير .. عبدالله وهو يبتسم ..: الله يسمح ذنوبك يا حميد ..لا والله اسمحولنا على القصور .. ان شاء الله بنشوفكم في البلاد على خير وفرحه يا ربي .. حميد ومطر ..: ان شاء الله عبدالله وهو يلتفت على خليفه ويسير يسلم عليه ويوادعه .. عبدالله ..وهو يسلم على خليفه ..: ودعناك واحد يا خليفه ما خان امانته .. وان شاء الله راح اشوفك في البلاد .. والعذر منك والسموحه على القصور يا بو مطر .. خليفه وهو يسلم على عبدالله ..: ومن قال وداعه .. والله يسمح ذنوبك .. واسمح لنا انته بعد على طوله اللسان .. ترانا مشاء الله .. فالحين بس في الكلام .. هاهاهاها عبدالله وهو يمزح ..: لا عن الكلام .. انته معروف بطوله لسانك ..هاهاهاها.. بس مهما تقول .. كله كلامك ذهب يا بو مطر .. والله شهاد انه ما ينمل .. خليفه وهو يهز راسه ..: لا حول لله . .بدينا في اللواته .. هني الكل بدى يضحك ....واولهم عبدالله ياللي احزنه فراق خليفه .. بس مهما كان .. خليفه بيتم خليفه .. وعمره ما راح يتغير .. وهني يتلتف عبدالله في مطر وحميد ياللي كانوا واقفين جنب بعض ..: بو خليفه .. ما تبوني اوصل شي للفرجان هناك !! .. ولا مقصرين من شي انتوا هني !! .. ترانا اهل .. والذخيره حرام ..ولا امبينا رسميات !! مطر وهو يبتسم وعبدالله يكبر في عينه اكثر واكثر ..: يا علك باقي يا عبدالله .... والفريج ما ناقصهم غير رجوع خليفه بالسلامه .. ان شاء الله انكون على اتصال .. عبدالله وهو يبتسم ..: ان شاء الله بترجعون كلكم سالمين غانمين يا رب ..وانا رقمي عند خليفه .. وارقمكم باخذه ان شاء الله يا اما من خليفه ولا سعيد .. مطر وهو يبتسم ..: ان شاء الله حميد وهو يتقرب من خليفه : في حفظ الله يا عبدالله .. عبدالله ..وهو يلتفت في حميد ..: ومن قال يا حميد .. وهني يطلع عبدالله بعد ما استرخص من الكل وسار للفندق .. وطلعت معاه هند وسلوم .. وساروا للمطار .. .." يتبـــــــــــع ".. ...تحيااااتي... **أريام** |
|
|
|
| مواقع النشر (المفضلة) |
| الذين يشاهدون محتوى الموضوع الآن : 2 ( الأعضاء 0 والزوار 2) | |
| أدوات الموضوع | |
| طريقة عرض الموضوع | |
|
|
يعطيكي الف عافية على الاجزاء هاي وانشالله تنزلي المره الجاي قسم كبير متل هيك عنجد القصة ولا أروع من هيك 
العرض العادي
