صباح الخير ياغالي صباح النور يافتان = صباح المسك ياعنبر انا بالحيل مشتاقي
صباح الصوت والبسمه صباح الزين والتيجان= صباح الزين ياشعري عليك يحن خفاقي
صباح الذوق والروعه صباحً نور فجره بان=يخصك انت دون الناس ياشمسي ومشراقي
صباح الخير ياحلوه كتبني للوله عنوان = وجريته وغنيته من الاعماق لعماقي
انا ما اقدر على شوقك ولو حاولت به كتمان = على جسمي على وجهي يبين الحب واشواقي
زرعتك حب في قلبي وكنتي شجرة الريحان= وانا العاشق وانا الحارس وانا يازين لك ساقي
طلبت الله ياخلي بأنك ترحم الولهان = سهر ليله مع الوحده على نار الهوى شاقي
الا ياجمرةٍ قلبي بها يحرق بلا دخان = وتسهرني وتشقيني وليل البرد بي ضاقي
انا ما اقدر على الفرقا ولا بعدك ولا النسيان = لانك قطعةٍ مني دواي وكل ترياقي
ترى فرقاك لو تحصل يجي من بعدها الطوفان =تروح الروح من جسمي وجسمي هيكله باقي
معاك اعيش بالفرحه وبعدك مجمع الاحزان = فلا تجعل محبتكم لنوم العين سراقي
بدعت الشعر من اجلك ومن اجلك تزين الحان =عيون الشعر تجرفها لشوق الزين تواقي
وانا القاسي وانا العابس وانا الثاير وانا البركان = ولكني معك صاير بكل شعور منساقي
انا لولا حسبة حساب منقودي من العربان = لصيح بعالي القمه واقول اسمك بالافاقي
سلام الله ياخلي عدد ما ترقص الاغصان = عدد ما تزهر الزهره وتخضر خضر الاوراقي
عدد لوح البروق اللي سحابه ينهمر هتان = وتسقي الارض من صبه ويصبح سيل دفاقي
وتحكي به اهل مكه واهل حائل واهل نجران =ويفرح به مع الفلاح راعي ضان ونياقي