اللي عمره ماتبخر ..... تبخر واحترق

[رونـRonaaaـااا]

هذا موضوع قرأته في مجلة وأعجبني جداااااً
وحبيت اعرضه عليكم وابي اعرف وش رأيكم في هالموضوع وخاصة بعد هالآحداث اللي ملخبطة العالم كله ..



في عهد الخليفة عمر بين الخطاب قدم إلى مكة أحد سفراء المشركين وكان جاي يتفاوض مع خليفة المسلمين عمر بن الخطاب رضي الله عنه وكلنا يعلم أن سيدنا عمر كان حاكم آنذاك معظم مشارق الأرض ومغاربها وكانت الخلافة الإسلامية تحسب لها ألف حساب لقوتها آنذاك " الله يرحم آنذاك مدري ليه وأنا أقول آنذاك كني ماسك مسدس وجالس أرمي فيها كفر طيارة في السما أبغى أقلبها "

المهم " نرجع حق محور حديثنا "

هالسفير جا وسأل عن عمر بن الخطاب وكان متوقع يلقا قصور وصولجان وحرس مشدد ومدرعات اكس بي وراه " اكس بي ؟؟؟ هذا مكانه برنامج وندوز ولا أنا غلطانه "

المهم انه جا وسأل عن قصر أمير المؤمنين وكان ركبه ترتجف وهو يسأل وكل ما قال قصر كانوا المسلمين آنذاك يبتسمون على سؤاله وكانوا يحذفون فيه من شارع لشارع لين جا حق آخر واحد وقاله أين أجد قصر أمير المؤمنين ؟؟ << اخصص ياللغة العربية الفصحى

المهم قاله هذاك هو اللي نايم تحت الشجرة فوقف وهلة مستغرب يحسب ان هذا يتتريق عليه فقال له انت تمزح معي ؟ قال له هذاك هو قدامك بغيت تروح له رح ماتبي خله يكمل رقاده ..
المهم إن الرجال قرب من عمر وقال قولته الشهيرة يوم شاف سيدنا عمر قرير العين وهو نايم في سبات لا حرس حوله ولا علم امريكي على نخلته قال " حكمتا ..... فعدلتا ..... فنمتا "
ورجع لقومه وقالهم اللي ماصدقوه فيه وطبعاً اللي خلاني أقول هالحكي هي قصيدة قريتها لطلال الرشيد " رحمه الله " عن الفشخرة والاسراف في الحماية في السفر واللي ملاحظه فينا لاجينا نسافر برا ولا كل واحد جار وراه أربع علوج كلها حماية له .. وعلى إيششششششش ؟؟ وش انت عشان تخاف من الاغتيال ولا تخاف أحد يتعرضك ؟؟

ليه العصابات ماعندها شغل يوم تجيك أنت ياراعي ونشات الشعير ولا غنم استرالي ولا بياع الكفر ؟ ولا صاحب محلات الفول والمعصوب ؟؟
ولا تظن انك أنت وجهك كفو الواحد تطير رقبته عشانك ؟ وربي لو أشوفك بالنعيرية واقف عند محطة بنزين اني لأسألك أنت والموتر للبيع ؟ بجد وضع غريب شفناه في الخارج وخاصة الدول الأوربية وخصوصاً في فترة الأجازة الصيفية
اصلاً دامك خايف ليه تسافر برا انت وجهك ..
كل واحد من هاللي منعم الله عليهم ساحب وراه عشرة حماية وياليتهم خوياه كان قلنا جزاه الله خير اللي سفرهم ووسع صدورهم ووسع صدره " مدري متى ربي بيوفقني بواحد زي ذولا يوديني باريس أطيح بذا الشيز كيك والكروسوان لين جبهتي يصير مكتوب عليها منطقة أمنية تحتاج لحماية "
لكن تلقاه من هالملحط اللي ربي منعم عليه بكم قرش من ورا بيع كراتين المناديل عند اشارات المرور ورايح يتفشخر في هالأجانب ويكشخ ابهم ولاهوب ناقص كشخة الكرشة قدام ثلاثة متر " أنا اشهد تشوفه منتفخ ودك تسأله انت لحالك ولا معك أحد في البنطلون ؟
وربي لو أني ارهابي بستخسر موته لني وقتها بخاف على ملفي الإرهابي نظيف لا يقولون ذابح لك واحدن مايسوا قيمة الطلقة وش جانا ؟؟
ماكنا كذا قبل كنا نسافر ونجي ومعينين من الله خير ولا أحد حولنا ولا أحد درا عنا وصرنا الحين ما نروح للبقالة في شارع الاجورد رود عشان أجيب بكت شاهي إلا ومعي ثلاثة ناطحات سحاب حماية بلدوزر للدرجة ذي تشوف عمرك مستهدف ؟ ولا وزير ولا شخصية مهمة ؟

سعود الفيصل إلي هو سعود الفيصل واللي يعتبر من أهم وزراء الخارجية في العالم العربي والإسلامي واللي مفروووض إنه يأمن له الحماية لا جا يسافر مامعه غير سكرتير خاص بعمله ماله علاقة بالحماية أسأل الله يحفظه قمة في التواضع والإيمان بالله سبحانه وتعالى بأنه مايصير إلا المكتوب " تسمعوني يالملحط ؟ المكتوووب يعني وفرو قروشكم ,,,

عندنا مثل في الخليج يقووول " طرت ولا نزلت هذا سيفوه وهذي خلاقينه "

وفي النهاية دعووووووووة لإقفال مطاعم المندي والمظبي والمضغوووط لني أشوفها السبب الرئيسي في انتفاخ كروش ربعنا والغوص في مخيلتهم لأنها ممكن تكون هالكرشة مغاعل نووي لازم حمايتها والحفاظ على درجة حرارتها في الخارج من خطر الانفجار .


منقووووووووووول من مجلة

تحيااتي للجميع

رونـــRonaaaـــااا