[₪ همسـﮯ الطفولة ₪]

كانت في غرفتها بعد ماراحوا خواتها وهي مالها خلق تكلم احد حتى وليد...كانت خايفه انها تنكشف قدام اهلها وكان خوفها الاكبر من الله اللي يشوفها ويستر عليها تتمنى تكون عندها القوه حتى تتوقف عن المكالمات اللي ماتدري وين ممكن توصلها...
رن تلفون غرفتها وكان المتصله مشاعل...
ريم :"الو"
مشاعل:"هلا ريم ...اشفيه صوتك..."
ريم:"مافيه شي.."
مشاعل:"علي انا..."
ريم:"ماادري احس اني متضايقه..."
مشاعل:"اكيد ماكلمتي وليد..."
ريم:"مالي خلق..."
مشاعل:"غريبه..."
ريم:"لا غريبه ولا شي..."
مشاعل:"ريم احس فيه شي..."
ريم وهي تتنهد:"ماادري اش اقولك بس اليوم خالد كان يلعب في جوالي وشاف رسايل وليد للي نسيت امسحها واستغرب ان فيه بنت ترسل هالرسايل..."
مشاعل:"لا يكون شاك يوم مسك جوالك.."
ريم:"لا مهو شاك بس نظراته لي عقب تذبح..."
مشاعل:"احرصي مره ثانيه"
ريم:"افكر جديا اني اقطع هالعلاقه وارتاااح من العذاب اللي احسه كل يوم"
مشاعل:"كيفك بس ترى اللي تسوينه مايتعدى مكالمات ومايضرك بااي حال من الاحوال"
ريم:"ياخوفي المكالمات تجر لشي ثاني....اللحين وليد يلح يبي يشوفني"
مشاعل:"ماادري بس اذا كان في مكان عام مافيها شي..."
ريم بعصبيه:"الظاهر مانتي بصاحيه ....مستحيييييل اخليه يشوفني لو اش ما صار"
مشاعل:"طيب هدي نفسك...لا تعصبين"

^^^^^^^^^^


في مكان قريب منها كانت بسمه تنتظر خالد واللي كل مامسحت دموعها تجددت ...
تحاول لما يدخل تكون هاديه جدا...بس انفعالاتها تغلب على الهدوء المصطنع اللي تحاول تظهر به...من يوم هي صغيره وهي تتمنى تكمل دراستها مهو حب في الدراسه قد ماهو حب في تأمين مستقبل ماكان مطمئن لا مع عمها...ولا مع خالد...
سمعت الباب لما فتح وشافت خالد داخل بقامته الطويله...ناظرها حس انها نايمه لانها كانت منسدحه على الكنبه وفي الظلام واتجه للغرفه...
بسمه:"خالد"
التفت عليهاوهو متفاجأ انها صاحيه:"غريبه صاحيه في هالوقت.."
بسمه:"بغيت اكلمك اذا امكن..."
اتجه لها وشغل الابجوره وحطت يدها على وجهها لانها حست النور كان قوي على عيونها اللي كانت في الظلام...عدلت جلستها وجلس بجنبها...
خالد ببرود:"خير ...اش عنك"
حست من نبرة صوتها انها بنرفزها قد مايقدر...بس حاولت تضيع عليه هالفرصه
بسمه :"خالد ليش تقول اني مارح اكمل دراستي.."
خالد:"لانك ببساطه مارح تكملين..."
بسمه:"ممكن اعرف الاسباب..."
خالد:"قلت الاسباب لان الدراسه تعب عليك ياحيااااتي"
بسمه:"لا مهي تعب..."
خالد:"حتى لو مهي تعب منتي دارسه يابسمه"
بسمه:"ليش انت كذا...بس تدور اللي يتعسني وتسويه"
خالد:"اسألي نفسك"
وقام بيروح عنها...وحس بيدها تمسك يده التفت عليها ولاقاها منزله راسها واضح من مسكة يده انها في قمة توترها...رجع جلس بجنبها يحتريها تتكلم ...
بسمه وهي تحاول تتحكم في دموعها اللي نزلت غصب عنها :"خالد الله يخليك امنعني من أي شي الا الدراسه"
حس خالد ان الدراسه لها اهميه خاصه عند بسمه ماتوقعه...
رفعت راسها... :" اذا اللي تبيه ياخالد تذلني واني اترجاك...انا اللحين اترجاك ماتحرمني من حلم حياتي..."
خالد:"لا يابسمه ماابيك تترجيني ولا ارضى لك المذله..."
بسمه:"اطلب اللي تبي ياخالد بس لا تحرمني من دراستي."
مسح دموعها ورفع وجهها بيدينه :"طلبي الوحيد انا ننسى كل اللي صار...انسي عبير...وانسي كلامي الجارح لك ...وبنسى انا كلامك اللي يسم البدن...ونبدى حياه جديد مثل أي اثنين توهم متزوجين...يابسمه انا مستغرب منك كل ماقربت منك خطوه بعدتي عني مية خطوه... "
بسمه:"اخاف ياخالد...."
خالد:"من ايش تخافين..."
بسمه:"اخاف اطيعك وتتخلى عني.."
خالد:"يابسمه تأكدي اني مستحيل اتخلى عنك...غصب عني صار لك عندي مكانه كل مالها تزيد..."
بسمه:"ماادري ياخالد عطني وقت حتى احاول انسى....واكون مرتاحه اكثر"
خالد:"خذي كل وقتك(وهو يتنهد)وبصبر ان الله مع الصابرين..."
قرب منها وباسها اول مره يسويها وهالحركه وترت بسمه اكثر ماهي متوتره من لمسة يدينه...
خالدوهو قايم:"تصبحين على خير..."
من توترها ماقدرت حتى ترد عليه....التفت عليها لما وصل الغرفه
خالد:"ودراستك بتكملينها في كل الحالات..."
اول مادخل حطت يدينها على وجهها...مهي عارفه هي سعيده ولا خايفه ولا متردده حست مشاعر وانفعالات كثيره في داخلها....الطاغي عليها الخووووف من المستقبل....

نهاية البارت الرابع عشر
لاتحرموني من ردودكم الحلوه

اتمنى ان يعجبكم وقراءه ممتعه