قصيدة الاسرار == للمساعد

[**نجمة بحر**]

يارفيف الماء وفجر العيد واحزان المواني
= ياأكثر اهل الأرض طيبة قلب .. وأسرار ٍ دفينه


المكان اللي هنا .. مليان ضحكات وأغاني
= والكلام اللي بغيت اقول .. يحتاج لسكينة


شوفي الركن البعيد هناك كنّـه صدر حاني
= هذا هو اللي يليق بشاعر وبنت ٍ حزينه


إنسي الشارع وعتمات الزوايا والمباني
= هاتي يدينك نلف الغيم ونشكّل مدينه


عندي الليلة كلام وصمت وأخاف الثواني
= تظلمه او تظلم اللي فيه كم ضاعت سنينه


بس لازم تسمعين اللي ابي ولاّ تراني
= لو بـ أعيده لك نسيت ورحت اقول اللي تبينه


شي واحد قبل ما أبدأ ماابي أي شي ثاني
= يخطر فبالك وانا اكشف لك شعور تجهلينة


إن أنا وبكل ماتحملة (احبك) من معاني
= كنت وراح ابقى احبك لين مدري وش هو لينه !؟


بس والله ماقدرت انسى ولا همي نساني
= لاذكرت انسان فيه اسرار مابينك وبينه


كل ماتطري علي فكرة هواك الأولاني
= أشعر اني انطعن مليون مره من يدينه


أشعر ان عيونك الله ماخلقها إلا عشاني
= كيف كانت تبتسم له قولي انك تخدعينه !


صورة انه كان يمسح دمعك تزلزل كياني
= وكيف كان يلم شعرك ويتبعثر في يمينه


حتى إسمك يوم رحت أدلّـــلّـــه حظي رماني
= بنفس الأسم اللي يقول .. بذمتك ماهي غبينه ؟!


وكنّي اللي كل ماناديك بالإسم الفلاني
= أطلب النسيان يترك منه شي ٍ تذكرينه


لاتظنيني اناني .. لا .. انا مانيب اناني
= لو سلمت من الغرق .. بـ أموت في ظهر السفينه


ياأني ماأكمل واعاني .. أو أكمل .. ثم أعاني
= كل ماأسمع طاري اسمه او تجي عيني فـ عينه


أينـّا كان الضحية وأينّـا اللي كان جاني
= مدري .. ولكن قراري لازم انك تقبلينه


مثل ما اكره فكرة انه واحد ياخذ مكاني
= مااقدر اجلس في مكان انسان .. كنتي تعشقينه

الشاعر / فهد المساعد

[نوير بنت نوره]

الله الله صح لسان الشاعر

شكرا نجمة بحر

أختيار موفق يدل على ذوق رفيع

الكلمات أكثر من رائعة

وتعبير جميل جدا من الشاعر عن شعوره بالغيرة

لكي أختي شكري وتقديري

وتحياتي لكي نجمة بحر

[خاطــــــوف]

اختي العزيزة
نجمة بحر
تحيه وتقدير لهذا الطرح
اختيار موفق وانتقاء جميل
للكلمه وهذا النقل يدل على
ذوق واحساس بالكلمه تسلمي
ويسلم شاعرها القدير
وابيات رائعه اعجبني منها

ياأني ماأكمل واعاني .. أو أكمل .. ثم أعاني
كل ماأسمع طاري اسمه او تجي عيني فـ عينه
أينـّا كان الضحية وأينّـا اللي كان جاني
مدري .. ولكن قراري لازم انك تقبلينه
مثل ما اكره فكرة انه واحد ياخذ مكاني
مااقدر اجلس في مكان انسان .. كنتي تعشقينه

يعطيك العافيه
اتمنى لكي التوفيق
تحياتي وتقديري

[**نجمة بحر**]

تسلمين اختي نوير على التواجد
واشكرك على كلماتك العذبه بالرد
لك خالص الود

[**نجمة بحر**]

خاطوف
لك كل الشكر على التوااجد
واسعدني ردك الراقي وكلماتك الجميله فيه
لك خالص التحاااياا

[رومانسي حايلي]

لاتظنيني اناني .. لا .. انا مانيب اناني
= لو سلمت من الغرق .. بـ أموت في ظهر السفينه


ياأني ماأكمل واعاني .. أو أكمل .. ثم أعاني
= كل ماأسمع طاري اسمه او تجي عيني فـ عينه

نجمه بحر


يعطيييك

العافييييييييييييييه

[سلا قلبي]

يسلموووووووووو
على النقل المميز


صح السان شاعرها

[ঔღঔأسماء الحبঔღঔ]

واووووو روعة ياااا(نجمة البحر))000

سلمتي 000ويعطيك العاااافية000

[**نجمة بحر**]

رومانسي حايلي

أميرة الشعر

**أسماء الحب**

حياااااااااااااااااااااااكم

اسعدني توااجدكم
شكرااااا لكم