قصه قمر وخالد قصه في قمه الروعه تبجـــي

[بنوته خبله]

تابع ..

(( جاسم لاحظ على خالد إنه متعجب من جمال قمر ولو إنه مبرطم شوي وما يعطيها ويه ---- حتى جاسم نفسه انصدم --- بنت أخوه مو بس حلوه --- إلا كانت حوريه ----- الكل بارك للمعرسين من الأهل --- أبو إبراهيم يود يد قمر ولبسها خاتم ذهب ضخم مرصع بالماس ------- لمعت دموع قمر بالماسات ورفعت راسها تبوس عمها على خده ...))

بو خليل :: ماخطيت يوم خذيتج لخالد --- بنتي وأخذت ولدي --- أأأألف مبروك ياقمر بن ضاحي ...

قمر تأثرت وايد من كلام عمها لكن وين :: الله يبارك في حياتك ..

((تحرك بو خليل يعطي مجال لأبو قمر يهنيها ويبارك لها ----وأمها وأم خالد اللي عطتها خاتم ثاني مرصع بعد بالماس بس بشكل خفيف ))

جاسم :: الله بالزين يالحور والله ماخطى الوالد يوم سماج قمر....


قمر :: الله يخليك عمي ...

جاسم :: أي الله يرحمه الوالد ----- ياريته ويانا

(( قمر من صج تمنت هالأمنيه لأنه يدها مستحيل يخليهم يزوجونها بالغصب وسبحت دمعه بعينها ---- الله يرحمك يا سبع الخير -----لو تشوف حالتي اليوم شبتقول ----
بعد ما هدى الجو شوي على الكوشه ---- قعدت الفرقه عند طرف المسرح بالمكان المخصص لهم خلف الستار ----

مريم ونوفه يرقصن من خاطر على الأغاني ومريم كانت رقاصه من الزين ---- وجمالها كان ساحر ---- حتى لولوه ووسيمه وشهلا وناديه عملن جو من بآخر الصاله --- وسيمه كانت ترقص لهن مختلف الرقصات والكل يضحك وينعجب بها ---- ليما مريم راحت لعندهن اهي وارفيجتها نور

جاسم يطالع لولوه باعجاب بالغ من بره الصاله واهي تدري بعيونه بس ماتعبره لأنها ان سوت حركه ما حركه وياه بتروح عليها ---

جاسم ابدوي ----- والبداويه طبعهم خطير ---تملكي

يلست قمر مع خالد ---- بنفس الكرسي ---قربهم لبعض كان ولا شي بالبعد والبرود اللي كان بيناتهم --- كانت المصورة تبي تاخذ لقطات رومانسيه أو حميميه بين العروسين بس ماقدرت ---خالد يايوقف وأياديه متشابكه وقمر تشغل نفسها بالبوكيه الضخم---- أو لين يلسوا كل واحد منهم يطالع الجهة الثانيه --- راحت المصوره عنهم وخالد قعد يتنهد --- قمر التفتت له --- تخبلت عليه ---صج وسيم --- آخر مره شافته قبل خمس سنين كان للحين بالكويت---- كان وسيم بس مو مثل اللحين ---اللحين استوى ريال ---- ولا كل الرياييل ----بس خسارة --- ما تقدر تشعر بوجوده فستانها كان من الحلا والفخامه لدرجه إنه طاح على ريل خالد بعد ---- فستانها من تصميم امريكي --- الصدر عاري من طرف وتلتف نوع من الحركه على رقبتها تغطي اليد الثانيه --- الفستان مخفف بلمعه ذهبيه وحتى داخل الورود المطرزه ---

خصلاتها كانت طايحه على جتفها من طول شعرها ولأن بعد التسريحه خفيفه وما فيها مثبت بس شكلها كان روعه –قمر كانت مفتشله واهي تحمل البوكيه --- كان أكبر منها وثجيل ---بس لولوه واوامرها --- كلمت مريم عن البوكيه اللي بالغرفه اتييبه لهااحسن من هذا --- راحت مريم ويابت البوكيه اللي كان أحلى وأنعم بألف مره عن اللي عند قمر --- حتى إنه لفت انتباه خالد وتحمد الله عن البوكيه الثاني --- قمر كانت اللي مصممه الورد بهذا البوكيه ---منسقه الألوان بين الأصفر والأبيض --- لأن فستانها كان أبيض بلمعه الذهب على الأطراف وبين النقش اليدوي ---

خالد كان يفكر في ندى ويتخيلها على الكوشه وياه ---
حس بالغصه في حلقه وإنه ما يقدر يتنفس --- ولا يقدر يسوي شي إلا إنه يستسلم ويسكت---

يو البنات دفعات دفعات يسلمن على قمر وأكثر الأسباب عشان يشوفن العريس والعروس عن قرب ---- لين ماوصلت وسيمه وشهلا وناديه ويت معاهن لولوه لأن تدري عن وسيمه وناديه وطبعهن الشيطان----))

وسيمه :: ألف ألف ألف ألف مبروك ياقمر--- والله إنج جيكره--- صج لي قالوا المكياج فن -----ههههههههههههههههه

الكل ضحك وخالد قعد يسمع كلامهن

وسيمه :: إلا قولي لي --- خدودج علامهم حمر ---- خلصتي بلاشر الدنيا---- صج إنج مصطنعه .....

قمر :: طالعه عليج ياللوسه----

وسيمه :: هاااااا.... جان زين والله إنتي تحلمين في ملمح من ملامحي ---- ولا شنو ندوي ؟؟؟

خالد التفت من الاسم على باله ندى

نادية :: أي نعم ---- ولا عاد خشمج بالبلوشيه حلاته والله أمووووووواه

شهلا :: بس عاد فضحتونا يم المعرس ----
توجه كلامها لخالد :: ألف مبروك عليك بقمر --- تراها غاليه حطها بعيونك ماقصرت ويانا والله لو ما أهي جان إحنه نعيد السنه الله يخليها --------

وسيمه :: أي والله --- الله يخلي براشيمها سنه ولا أحد يشوفها ههههههههه

قمر انحرجت من كلام وسيمه

شهلا :: بس عاد فضحتوني تراها مديرة المدرسة هني---
وسيمه واهي ميته من الضحك :: ويه ياربي لاتسمعني ---مافيني أعيد السنه بيخلوني أقعد أول كرسي ----ههههههههههههههههههه

ناديه تكمل :: جنج بقره جدام الأبلات ههههههههههههههههههههههههههههه

(( حتى خالد الي حلف على عمره ما يضحك ضحك على خبال ارفيجات قمر ----
حسهن صغيرات وعلى نياتهن --- مثل قمر ---يطالع قمر وأهي تضحك بحياء جدامه ----ياترى حياتنا شلون راح تكون يا قمر ---- شلون راح نعيش عمر كله مع بعض وأنا ما أحس بشي تجاهج -----------))

وسيمه تتكلم هالمرة بجديه أكثر :: صج صج خلود (( خالد فتح عيونه --- أصغر عيالها خلود )) أوه أوه خالد الشيخ ---- قمر عزيزه وغاليه ولو إنها تهذر وايد بس حبابه وأنا ارفيجتها من يوم الصف الأول أي من بعد لولوه ---حاسب عليها ---- وحطها بقلبك قبل عيونك -----

خالد بكل جديه :: إن شاء الله أقدر على اللي تطلبينه ---

(( الكل استغرب من كلامه إلا قمر اللي ما تعير كلامه أي انتباه ))

لولوه :: يالله يا بنات ---- ورانا درب ؟؟؟

قمر بصدمه :: وين رايحه ؟؟؟
لولوه :: بسم الله الرحمن أهني يا حبيبتي هو إنه بس زايد أخوي بيوصلهن ----

(( قمر لمعت عيونها يوم إنذكر اسم زايد --- زايد راعي الجوري مثل ما تسميه وسيمه ---- كان كل يوم يوصل ورده جوري لقمر مع لولوه وقمر تحتفظ فيها وعقب تجففها وتخليها بكاس بلوري عندها بدارها ---- وخت راسها بس لولوه هزتها ---

لولوه :: لا تحاتين----- ربع ساعه وأنه راده لج ---

وسيمه بدت تبجي على هدوء :: بتوحشينا يالكريهه والله إنج كل الخير قمور ---

قمر بجت وياهن ---- ارفيجاتها ماراح تشوفهن مرة ثانيه ---- وإن شافتهن يمكن مره بالسنه
قمر توصي وسيمه وأهي تبجي :: تكفين وسووم لاتنسيني وكل ما تقصدين ذكريني --- أحب قصايدج ---

وسيمه لمت قمر :: فديت عمرج وأنا لي غيرج بالقصايد ----

نادية مسحت دمعتها :: يالله وسوووم حرام عليج بجيتيها --- حبيبتي قمور لا تنسينا تكفين --- تراج بالقلب ياروحي ----

قمر :: وإنتي ندوي بعد --- وهاج أي شي محتايه له لا تنسيني ؟؟؟
(( ناديه بنت شهيد ومن أسره محتاجه وقمر ما تقصر وياها وويا أهلها ))

ناديه :: أنا أقدر --- إنتي الغاليه أم الخير ----

قمر :: الله يخليج يا بنت الشهيد ---- (( ناديه تحب الاسم إلي تناديه قمر لأنها كانت على طول تتمنى أحد بفخر بكونها بنت شهيد ))

شهلا :: حبيبتي لا تنسيني تبين حجاب ولا عمل ولا يني أنزله بأحد دقي علي أم الطبوب أنا ------

قمر واهي تمسح دموعها :: ما شاء الله عليج فج الفال لمتد ههههههههههههه

شهلا والكل ضحكن ووسيمه ردت :: أي أي هذا هو هههههههه العيم عندهم غير فج الفيلان -------

شهلا :: وووويه على ويهج ما أدري منو أمه اللي أربع وعشرين ساعه ببيتنا حق هالسوالف --------

وسيمه :: سكتي لا بارج الله فيج يالله نمشي -----

(( ودعن قمر وراحن وخلن قمر بذكرياتها --- قعدت قمر مكانها واهي موخيه راسها تسترجع الذكريات --- الهده ---- وأيام الامتحانات --- والتوصيلات وسوالف وسيمه وحب ناديه العميق لواحد من الشباب اللي ايون عند المدرسه --- التلفونات والعلاقات وهواش الصف والأبلات والفسحه والمحاظرات وربشه وسيمه وناديه ---- وتذكرت أول ما شافت زايد عند المدرسه --- البنات كلهن تخبلن عليه ولكن اهو تخبل عليها اهي --- تذكرت صدها لزايد وتخيب أمله وتحرق دمه مع إنها وايد تعزه --- كانت مراسيله توصلها واهي تشق الورقه وتحتفظ بالورود --- وتوده بس عمرها ما قالت إنها تحبه --- يمكن لأنها تقدس الحب ما تفكر إنها توهبه لكل من --- ومع خالد ماراح توهبه لأحد --- بتحتفظ فيه بقلبها --- لنفسها-----

خالد من طرف ثاني كان يطالع جاسم اللي الجو عنده عال العال يرقص --- وياكل ويا الفرقه --- والجو كل ما ايي له يخلى من الناس ----

الأهل كانوا فرحانيين حيل ما شبعوا من الرقص والرباشه والأكل --- ماكوا إلا اهو --- مع إن النار اللي فيه تخف شوي شوي وتهدى وكأنها تستعد لعاصفه بس اهو ما يدري عنها --- عيونه كانت موجهه على الباقه اللي جدامه --- ما يطالع الناس القاعده وما لاحظ البنت اللي يالسه تطالعه ودموعها شوي وتسجب حار على ويهها --- أغنية يوسف العماني ((مبروك )) كانت مشغله بهذي الحزه ))

شيماء :: يالله يا ندى ---- ما فينا نفشل روحنا أكثر --- لي متى بنيلس هني --- الناس كلها طلعت ما بقى إلا أهله ---

ندى :: ما أقدر --- أقوى مني --- أقوى مني ----

شيماء :: بس يالله قومي نطلع ---- الدنيا صارت فير وأكيد يبون يقعدون لحالهم

ندى تمسح دموعها وتزيد من كحلتها :: بس أول شي أسلم عليها --- وأشوفها ---

شيماء :: لكن يا ندى--------

(( راحت ندى للكوشه ---- تمشي بخطى كلها ألم وعذاب --- وتحس روحها تتقطع ألف مرة بكل خطوة ناحية حبيبها ورفيق أحلى أربع سنوات عاشتها بلندن ------
خالد وكأنه حس بقدوم احد ناحيته رفع راسه وانصدم كانت ندى ---- حبه الأول والأخير --- نبض قلبه مثل ما يناديها --- الله ياندى يايه تسمين قلبي وترطميني بالواقع المرير إنج ماراح تكونين لي ولا أنا راح أكون لج --- وقف على طول وقمر التفتت له وطالعت وين ما تطالع عيونه ---

ركبت ندى الكوشه وعيونها على قمر --- قمر وقفت واهي تبتسم للبنت --- ندى لاحظت الشبه بين عيون خالد وعيون قمر --- وكأنهم مرسومين لبعض من مازاد الألم بقلبها ---))
ندى :: ألف مبروك ياقمر ---

قمر باستغراب :: الله يبارك في حياتج

بيية مريم وجاسم اللي شهق يوم شاف ندى :: أنتي ما تعرفيني --- لكن أنا اعرفج ----((تطالع خالد ))—خالد كلمنا عنج وايد ---

خالد انصدم وقمر استغربت :: خالد ؟؟؟؟

خالد تكلم بارتجاف :: ندى رفيقة الدراسه كانت معانا بجماعه الدراسه والحلقه الدراسيه ----

قمر :: اهااا --- هلا فيج ندى ---

ندى واهي حاسه بالغصه تتصاعد فيها ---- قمر وطيبه :: ها يا قمر ما وصيج --- خالد بعيونج ---- تراه غالي حيل علينا ---

خالد يبلع الغصه وقمر ترد من غير نفس بس بابتسام :: ولا يهمج --- مهما كان --- اهو ولد عمي قبل لا يكون زوجي ----

ندى :: يالله ---- اترخص ---

خالد بلهفه :: وين ؟؟؟؟؟؟

ندى تلتفت له :: وراي درب للمطار ---- اليوم برد لندن ---
خالد اللي نسى وجود قمر :: ليييييش ؟؟؟

ندى بارتباك :: بروح أكمل دراستي ----و---- ماعندي أحد بالديره بعد ---- مالي قعده ---

خالد يطالع ندى بكل ألم :: الله يحفظج من كل شر ----

ندى :: وأنت بعد ---- يالله اشوفج على خير يا قمر ---

قمر اللي ضاعت بالموقف :: الخير بويهج ---

(( راحت ندى واهي ترفع الغشى على ويهها تخبي دموعها اللي نسفت ويهها بحرارة وعنف ---- وخالد من شدة الألم قعد على الكرسي مكانه --- حس إنه ميت --- روحه راحت ويا ندى --- وعيون ندى --- حبيبته ندى --- أخ يا قلبي --- ما أقدر استحمل أكثر --- أنا شمقعدني هني --- لازم اروح وراها --- معاها انا انتمي --- ليش يحملوني فوق طاقتي --- ليش يا ندى ييتي ومرضتي روحي أكثر وأكثر ---

جاسم ومريم يوا عند خالد من بعد ما شافوا حالته من روحة ندى ))

مريم لاحظت شحوب خالد :: خالد اسم الله عليك علامك ؟؟؟

خالد :: ولا شي ---- يالله خلونا نقوم نروح -----
جاسم :: تو الناس وقت ماقطعتوا الكيك وأنا خاطريه فيه؟؟

خالد :: خاطرك فيه خذه كامله وياك ----ما أبي شي ----

جاسم يطالع مريم :: عادي آخذه ؟؟؟

مريم :: أنت من صجك بعد ---- ها قمر شرايج ---- تقومون ؟؟

قمر حست روحها بتطلع ---بتكون بروحها ويا خالد بارتجاف :: وين ؟؟؟؟

مريم :: وين بعد ----المطار ----

جاسم :: بسم الله علامكم اختسفتوا مره وحده ---- اللي يتنافض واللي يرتجف ههههههههه صج معاريس----

مريم :: والله انك فارغ من الزين ----يالله أنه بروح أخبر أبوي عشان يقومون ----------

خالد :: سرعي الله يخليج -------------

مريم :: إن شاء الله

(( راحت مريم وسحبت وياها جاسم عشان تخبر أبوها --- قمر تمت تطالع خالد من طرف عيونها ---- خالد وايد تأثر من البنت اللي يات وتغير من يوم ما ركبت الكوشه عشان تسلم ---شتكون بالنسبه له ----لازم مكانتها جبيره ولا خالد ما بيتغير جذي مرة وحده ---بس أنا شيهمني أنا من بيفكني من هالمصيبه---بطلع وياه -----بنكون روحنا --- بنكون روحنا ---ياربي استر على عبيدك ---الهمني الصبر يا ربي----

خبرت مريم الكل إن خالد يبي يروح مع إن رحلتهم الساعه ((3))واللحين الساعه (( 1:30)) محد أعترض وقام أبو خليل وأبو خليفة للمعاريس وكل الأهل ----
غطوا قمر مرة ثانيه ----ولولوه للحين ما وصلت ))

قمر لمريم :: وينها لولوه ؟؟؟؟

مريم :: ما أدري--- شكلها راحت -----

قمر ارتبكت :: أهي قالت ما بتروح ---ربع ساعه وبترد؟؟

مريم :: ما أدري قمور -----يمكن غيرت رايها ----

قمر :: من دون ما تقولي ؟؟؟؟

مريم مستغربه :: علامج قمور هدي بالج ---خبري فيج رياله ههههههههههههههه ----

قمر :: لا يا مريم بس ..............
(( سكتت قمر ---شتقول ----ما في كلام بالدنيا يمكن يوفي بمشاعرها --- خايفه ---ومرتبكه --- وحاسه روحها بتطلع من جسدها --- ماتبي خالد ---ما تبي تكون وياه بمكان لروحها --- ما تعرفه---هذا إنسان غريب عليها ---ما تحس بأي قرب تجاهه ---دموعها أخذت حريتها ---تتناثر يمين ويسار --- والكل يبجي من خواتها ---حتى مروة اللي ما تبي مكياجها يخترب قعدت تبكي على أختها الصغيره اللي ما شافت الدنيا للحين ----
تتزوج مره وحده ---قمر كان شكلها يقطع القلب --- أمها على يمينها وأبوها على يسارها والكل حواليها ---تبجي بصمت وعيونها خايفه --- الكل حسباله إنها دموع فراق الأهل بس أهي كانت تبجي من الألم والمرارة اللي بقلبها ---شراح أسوي بعمري كله مع إنسان ما أشتهيه ولا أواطنه بعيشة الله --- أنا شسويت يا ربي عشان تعاقبني جذي ----))
قمر :: يودي يدي مريوم والله إني بطيح اللحين ---

مريم :: بسم الله عليج حبيبتي ما بتطيحين وإن طحتي قوليلي عشان اصورج ههههههههههههههه ..

قمر :: مريم ؟؟؟

مريم :: اتغشمر ههههههههههههههه..

جاسم :: فجي يدج عنها أنا بيودها
(( ويود جاسم يد قمر واهو اللي دخلها الليموزين اللي كان موقف للمعاريس ---ركبوا فيه أربعتهم ومريم وجاسم اللي كانوا حاشرين الجو ولا عن خالد كان ساكت واهو يسمع السوالف وقمر تحس بالتعب والإرهاق --- من قعدتها لصلات الفير واهي ما رقدت---

في بيت بو خليل الحفل كان غير --- الفرقه تعزف والمنزل مزين بمصابيح بشكل هندسي حلو وعلى النخيل بعد ---

أول ما دخلوا --- خالد راح غرفته القديمه عن الرياييل وقمر راحت غرفتهم المشتركه ---

النسوان ظلن بالصاله والبنات راحن وياها --- حست بالإرتباك والخجل أول ما دخلت الغرفه --- الكل كان يمدح بالديكور وكل شي --- إلا قمر --- كانت تسحب لها جلابيه بشكل عشوائي من غير نفس تلبسها عشان بيروحون المطار بعد شوي ---لبست جلابيه ورديه مطرزه باليد بحبات خرز على شكل الورود --- الكم كان وسيع يبين نحول رسغها ---والحنه باللون الأحمر الروعه خلاها تصير مثل القمر ---
مسحت المكياج والكل حرج عليها ---قامت مروه حطت لها مكياج وردي خفيف بينها بمنتهى الجمال --- فتحت شعرها عن التسريحه اللي كانت مثبته بالطرحه وما حطوا عليه الأسبري خفيف لأنه قمر وايد تخاف على شعرها من هالمواد ---
قبل لا تطلع من الدار التفتت لحوض الكريستال --- قعدت تحوس بالأوراق اللي فيها --- ريحتها حلوه وينبع منها الصدق ---)) التفتت لمريم ---

قمر بحزن :: مريم --- أبيج تقطين اللي بالحوض اوكي ؟؟

مريم :: ليش شكله جوري ---مرووو يا بته لج ؟؟؟

قمر :: لا ما أبيه لين رديت بسوي لي واحد غيره ----

مريم :: إن شاء الله أمرج ولا أمر الحكومه ---يالله خالد ينادينا---

(( نزلت مريم وظلت قمر مكانها --- تسلم على خواتها --- وتوصيهن بالخير بأمهن وأبوهن ---

صارت الساعه(( 2:30)) وتحركت السياره للمطار --- خالد وقمر وجاسم ومريم بالأكس فايف السوده --- بس هاذول اللي راحوا المطار لأن خالد ماكان يبي أحد يروح المطار عشان ما يتعطلون مع إن شغلهم زاهب قبل لا يروحون -----خالد وجاسم كانوا قاعدين جدام والحريم ورى --- قمر كانت يالسه تطالع الدنيا من برع الدريشه --- سرحانه تفكر ---لو إن زايد كان زوجها --- شنو راح تكون مشاعرها ---أي شي إلا هالشعور المخيف ---مسرع ما نفضت هالأفكار من بالها لأنها حستها عار عليها وتعتبر قلة احترام لخالد على الرغم من إنها ماتهتم فيه ----

خالد كان يرد على كلام جاسم بجمل مقتضبه (( زين -----الحمدلله ----- مو وايد ---- إذا عن جذي لاتحاتي ---- إن شاء الله ))

بس هذا كان كلام خالد ---- لأنه مخه كله ويا إنسانه وحده --- ندى ----شلون تحملت ويات تشوفني قبل لا تسافر ---- وبأي يوم ؟؟؟---
يوم عرسي ---- تذكر اليوم اللي قال لها إنه راح يتزوج من بنت عمه ---- ندى أغمى عليها من شدة الخبر ---- ما توقعت إنها تسمع مثل هالخبر بحياتها ----خالد بجى لأول مرة بحياته ---بجى على حبه ----بجى على حبيبته الغاليه ----وما كان يدري إن هذي الدموع راح تكون بداية ماساه بحياته --- ))
ندى :: لا تبجي يا خالد ---تبي تزعلني أكثر ---دموعك غاليه حبيبي ....

خالد :: ما أقدر اشوفج وإنتي جذي ----أحس نفسي نذل وخسيس ؟؟؟؟

ندى :: لا يا حبيبي ---- أنت لا نذل ولا خسيس أنت أشهم رجل عرفته بحياتي --- أنت حبيبي ومستحيل حبيبي يطلع نذل أو خسيس ----بس هذي الدنيا لعبت علينا لعبتها ----ما تقدر نقول لها لا ------

خالد :: أنا مستحيل أخليهم يسيروني على هواهم ----أنا بكلم أبوي ؟؟؟؟

ندى :: لا يا خالد ---- أنت ما بتكلم أبوك ----أنت راح تسمع كلامه ------

خالد باستغراب :: لكن يا ندى ؟؟؟؟؟

ندى :: لا يا خالد يعني لا ----أنت ناسي إن أبوك مريض بالقلب ورفضك لبنت عمك راح يؤدي إلى ازمه كبيره بالنسبه له ---أنا مو مستعده إني ابني حياتي وياك على تعاسة عايلتك ----أنت أهم بالنسبه لي ----روح يا خالد ----تزوج من بنت عمك----واللي مقدره رب السما راح يصير --------

جاسم يرجع خالد للواقع :: هيييييييييييييييييييييييه بو وليد ----وين وصلت ----------

خالد :: هاا ------ولا مكان ----بس---------

جاسم :: انزين بو وليد ---- ما أوصيك في قمور أول سفرة لها برع الحضانه هههههههههههههههههه

(( مريم وجاسم ضحكوا إلا قمر وخالد اللي تنرفز من الموضوع ---ما يقدر يفكر إنه راح يكون ويا هالياهل بروحه لمدة شهرين ----ساعتين وما قدر يستحمل ----الله يعينه ---

قمر تكلمت ولأول مره بصوت مسموع للكل :: عمي بغيت أوصيك على مرسوم خالتي أنيسه ----تدري ما قدرت اتيي العرس --- بس أبيك توصل لها الشريط والحلا واللي زهبته لها --- تعرفها تحب الحلاو--------

(( خالد قعد يسمع كل كلمة تقولها قمر ---صوتها مخملي ----وكأنه من سالف الزمان ---حسها وايد أثيريه ----وكأنها من زمن ثاني ---))

جاسم :: إن شاء الله عمتي ---كل شي ولا هل الخير والبركه ---ما ننساهم آمري بعد ---تدللي ؟؟؟؟

قمر واهي تتذكر :: وارفيجاتي ---أبيك توصل لهم كل شي ----الشريط والحلا والبوكيه كلهن لازم يحصلن على ورده من ورداته ----

مريم :: أي واحد فيهم الجبير ولا الناعم ؟؟؟؟

قمر :: الناعم أي الجبير ----هذاك حذفوا وين ما تبون -----

مريم :: لا عاد هذاك يناسب غرفتي بخليه على الطاوله ---

جاسم :: من قال اصلا أنا باخذه----

مريم :: ليييييييييييش ؟؟؟؟

جاسم :: لعانه ----والله شرايج قمر ؟؟؟؟

قمر بشرود :: على راحتك -------

(( جاسم يطالع مريم من المنظره ويطلع لسانه ))

مريم :: وإنتي ما لقيتي إلا هالمطفوق يلبي لج كل طلباتج أنا وين رحت عنج ؟؟؟؟؟؟؟

قمر بإحراج :: لا بس ----لأن عمي يعرفهم وبيخبر نوفه عن اللي أبيه -----أنتي ما تعرفينهم زين -----------

مريم :: ماعليج -----بتعرف عليهن وحده وحده بس عشان خاطرج يالغاليه جم قمر بن ضاحي عندنا -------وحده وما شاء الله عليها ------

قمر بابتسام :: الله يخليج مريم -------

(( وصلوا المطار ----توادعوا ودعوا لبعض بالسلامه ----خالد شل حرمته وراح داخل الطياره ----قمر كانت تخاف من الطيارات وحرمت نفسها من لذة السفر بسبب هالشي ----بس لأنها ما تقدر تقول شي لخالد ولا تشكي له تحملت وحاولت إنها تتغلب على خوفها ---وخالد مايعطيها ويه ولا يوجه لها الكلام ---توجهوا للمقاعد اللي مأشره لهم ----قعد خالد عند الدريشه وقمر على الطرف ---ربطت حزام الأمان أول ما قعدت وكانت تنتفض من الخوف ---يا ربي ساعدني ---كانت تدعي بقلبها وعرق جبينها من الخوف بس ماتكلمت ---غمضت عيونها ---خالد حس إن قمر فيها شي بس ما تكلم وياها ---لين تبي تتكلم بتتكلم ---وأول ما سارت الطياره قمر شبصت على يد خالد اللي تفاجأ من الحركه ---طالع قمر اللي كانت مغمضه عيونها واهي تشد وقوتها كلها بيدها اللي تمسك يده----حس بالدوران ---شعور غريب انولد فيه من لمستها ----مع إنه لمسها من شوي عند الكوشه بس حس الحين بدفو يدها ونعومتها ----وأول ما ركدت الطائره شوي وخف التوتر فتحت قمر عيونها ----تنهدت بالقو عشان تزفر وتاخذ نفس ---انتبهت ليدها اللي كانت شابصه في يد خالد وبسرعه وبإحراج بالغ سحبتها وردتها لحظنها ))

قمر واللون الأحمر يصبغ خدودها بطريقه كرتونيه :: آسفه -----

خالد :: لا عادي ----بس حاسبي مره ثانيه ------

قمر باستغراب وشعور بالازدراء :: إن شاء الله ---

(( قمر حست بالقهر من هذا المغرور ---شقصده يعني اهي بالعمد سوت جذي ---لا هي بتموت عليه ولا شي ----
(( هههههههههه بيني وبينكم قمر كانت منحرجه حيييييييييييييل من كلام خالد ))

(( خالد لام نفسه شوي بس مسرع ما تعدل مزاجه -------

بعد شوي يات المظيفه تسألهم عن طلباتهم وقمر ما بغت شي ))

خالد :: إذا خاطرج فشي قولي ترى الرحله طويله لإيطاليا ؟؟؟

قمر :: لا ما أبي شي ----إن بغيت بناديها ---

خالد :: على راحتج ----تصبحين على خير-----

قمر بغير اكتراث :: وأنت من أهله ----

(( سند خالد راسه وغمض عيونه لكن هيهات يرقد مع إنه كان تعبان ----

قمر كانت تعبانه وحست شوي بالراحه يوم غمض خالد عيونه ----ردت حق مساعه شوي ---شلون مسكت يده ----أكيد يتحسبها الحين ياهل وخبله وتخاف من الطيارات ----والله كيفه يتحسب اللي يتحسبه بس لا يقعد يتغشمر علي جدام الكل المغرور المتكبر ---لذا حاولت تكون هادئه قدر الإمكان ---هدوئها هذا قادها للنوم ---خذت راسها على طرف خالد ورقدت ---خالد انتبه للهدوء اللي يمه ----كانت قمر راقده وكأنها ياهل ----شكلها كان جميل ويخلي الواحد يتعمق بالنظر لشكلها ----خصله شعر نزلت من تحت الشيله الناعمه تغطي جبينها ----خالد يعرف مدى تمسك قمر لذا رفع الخصله ودخلها بهدوء تحت الحجاب ---ورد يده مكانها ---ورد إحساسه بالذنب يطق على اللي قاله قبل شوي خالد قعد يفكر ---قمر ياهل ---بنت توها داخله ال18سنه ---تتزوج بهذا السن من شخص أكبر عنها بست سنوات ---ليش يسوون فيها جذي ---واهي ----ليش تتخلى عن حياتها عشان الزواج ولا اهي انغصبت مثل ما أنا انغصبت ----والله ما يندرى ----امبين إن الدرب راح يكون طويل وحياتنا راح تكون صعبه ----ياهل وعاشق ---الله يعينا إحنه الاثنين ياقمر ---الله يعينا ))


يتبع ...

[بنوته خبله]

ابي رد اذا شفت رد راح انزل بارت ثاني

[~شموع الغلا~]

يسلموووووووووووو حبيبتي بنوته
على التكمله انا كنت بدور عليها من زمان
كمليها ياقلبي عشان خاطري

[الـمـشـتـااااق]

يـسـلـمـــوووووووووو

[سراب عشقي]

بنوته خبله


مشكوورة اختي على الموضوع ...


تـم مراجعة مكتبة القسم .. القصة مكررة ,,,

تنقل الى المحفوظات ,,

دمتي بود