الأفلام المصرية لهذا الموسم 3

[صااافي الاصلية]

أسف علي الإزعاج

أحمد حلمي
منة شلبي
محمود حميدة

تأليف:
أيمن بهجت قمر

إخراج:
خالد مرعي

[صااافي الاصلية]

منقول
هدير علاء

مبدئيا أحب أقول لأحمد حلمى انت ممثل جميل أوى

انت مش كوميديان بس لأ انت ممثل و انا بصراحة كنت مستنية منك خطوة زى دى فى الفترة دى بالذات

و بقولك ان ان شاء الله اللى انت كنت تقصده يوصلنا بالفيلم ده هيوصل

انا مش هعرف أدخل فى تفاصيل علشان القصة متتحرقش بس أحب كمان أوجه تحية لخالد مرعى اللى حسيت بيه فى مشاهد كتير أوى

و أحب أقول كمان ان أسف على الازعاج من الافلام القليلة أوى اللى بتعلى جامد و بتتبقى أحلى كل لما جزء من الفيلم يعدى ..

و كفاية أقول انك خليتنى أعيط يا حلمى و أعيط بجد كمان

[صااافي الاصلية]

منقول
سلمي نور

هاى يا جماعةانا لسة راجعة من الفيلم الفيلم جامد جدا و بجد حاجة تحفة و انا مبسوطة جدا و احب اهنى حلمى و منة بالفيلم و الفيلم فكرته جديدة اوى يمكن مش كوميدى اوى بس الفكرة لذيذة جدا ك الناس طالعة من الفيلم مبسوطة جدا و ردود الافعال كانت حلوة جدا و احمد دوره يجنن و هوا كان طالع اسمه حسن و انا مش ححرق الفيلم بس اقول لكل الناس يدخلوا الفيلم بجد حاجة تحفه و الف الف مبروك يا حلمى

[صااافي الاصلية]

منقوووووول


انا محستش البوستر بتاع الفيلم قد ايه جامد جدا الا اما شفت الفيلم و فهمته .. بجد فكرة حلوة اوي
انا قصدي عالبوستر اللي فيه ضله بيزعقله

الفيلم حلو جدا كفكرة و لكن رأيي السيناريو فيه بعض النطات المربكة و اعتقد ان فيه مشاهد اتشالت في المونتاج كان فيها تفاصيل أكتر
مثلا مشهد اما كانوا عالبحر و قالها فاكرة اما كنا قاعدين و قلتيلي انا مش عايزة اتجوز عشان ابقي حرة و بتاع .. المشهد اللي فيه الحديث ده مش موجود
و في أخر الجزء التاني من الفيلم الرتم وقع تماما و كان فيه بعض الملل

الجمل الحوارية رائعة جدا عجبتني اوي
تمثيل أحمد حلمي كان ممتاز و مقنع

و لكن اعتقد انه مش هينجح أوي لأن الناس مستنية "حلمي" معين و الفيلم مش كوميدي
و الناس كانت متوقعة تدخل "تتمرمغ" ضحك ..
يعني في السينما اللي انا دخلتها .. فيه ناس قامت مشيت في الجزء التاني من الفيلم
و فيه ناس سقفت في الأخر .. يعني الفيلم ده هيخضع للأذواق و نجاحه مش هيكون ضخم .. ده مجرد رأي
_________________

[صااافي الاصلية]

منقول : بنت من شبرا

لفيلم على فكرة من وجهة نظرى

حلو جداااااااااااااااااااااااااااااااااااااااااااااا


احمد حلمى قدم دور جديد عليه

واداه باقتدار ومصداقيه عاليه جدا

الفكره جديده

والشخصيه مركبه وصعبه جدا

واحمد حلمى باداءه لهذه الشخصيه

اثبت ان انه ممثل قدير

كل السينما اللى كنت فيها كانت كل شويه تسقف لااحمد حلمى

بجد الفيلم عجبنى اوى

عجبنى ذكاء احمد حلمى انه محصرش نفسه فى نمط معين من الادوار

منه شلبى متالقه كالعادة

دلال ومحمود حميده طبعا لاخلاف عليهم

الفيلم اعتمد على عنصرى التشويق والمفاجات

والموسيقى التصويريه جميله وكانت بتعبر عن الصراعات الداخليه والمعقدة فى شخصية البطل

من الاخر اعتقد ان الفيلم ده حيبقى محطة رئيسية فى تاريخ حلمى الفنى

واحيي خالد مرعى لااخراجه المتميز لهذا الفيلم

[صااافي الاصلية]

منقول
dr.lecter
لسنه اللي فاتت لما دخلت كده رضا وشوفت مدي النجاح الجماهيري الساحق والنقدي قلت احمد حلمي وصل كده لاقصي القمه ويستحسن انه يستني شويه قبل مايعمل اي فيلم تاني علشان يحافظ علي مكانته

السنه دي كان فيه كتمان شديد علي الفيلم وماحدش يعرف اي حاجه عنه الا ان المؤلف هو ايمن بهجت قمر وده جابلي اكتئاب لان ايمن مابيعرفش يكتب افلام بدليل تجربه هنيدي السنه اللي فاتت وعرفت ان احمد قعد مع ايمن يكتبوا الفيلم من اول وجديد

بدايه من البوستر اللي فيه ابطال الفيلم بصوره متساويه ومن كميه الناس اللي داخله الفيلم لان حلمي هو الوحيد اللي افلامه تناسب جميع الازواق وجميع الطبقات

افلامه مش معقده ومش تافهه اوي يعني وتعتبر عائليه ولها جمهور كبير وبتقدم كوميديا زكيه راقيه مجنونه


ناس قالتلي حاول تدخل الفيلم في وقت تاني علشان مش هتلاقي اصلا تذاكر بس حاربنا وكافحنا لغايه ماجبت انا وصحابي التذاكر

ناس قالت لي قبل مادخل الفيلم مش كوميدي درامي قلتلهم اشته هو ده اللي انا عاوزه انا مش عاوز اتفرج علي تكرار لاحمد حلمي عاوز اشوفه بشكل جديد



وده اللي اتحقق لي



من اول مشهد احمد عامل شخصيه غريبه جدا هاديه بارده بلوك مختلف تماما نبره صوته مختلفه مشيته لبسه كل حاجه

تحسسك ان فيه حاجه مش طبيعيه وده كان صادم الناس شويه لانهم متوقعين من اول الفيلم هيلاقوا احمد الشقي ابو دم خفيف لكنهم لاقوا شخصيه جاده جدا بتتجسد ادامهم


بالاضافه ان الفيلم باديء بمشد مفاجيء بخطاب مباشر لرئيس الجمهوريه موجه له وكانه بيكتب لشخص عادي وده خلا بعض الناس تقولك الفيلم هيبقي سياسي Laughing

بتتعرف شويه علي طبيعه عمل حسن وعلاقته بوالدته واهله مش هاخوض فيها لان فيها تفاصيل ممكن تحرق احداث الفيلم لكن طول مانت بتتفرج وبتركز في الحوار اللي بيشمل حاجات كتيره تحس ان الفيلم عاوز يوصلك حاجه بس محتاج انك تركز معاه


ناس قعدت تقول فات ربع ساعه ومافيش كوميديا


مش فاهم هم عاوزين قرد ينطط لهم يعني ويقول كلام اهبل ولا ايه؟

الفيلم من اول5 دقايق الكوميديا بتتفجر منه بفظاعه لانها كوميديا موقف سريعه شبيه بكوميدا الفلام الفرنسيه والامريكيه مشوطبعا ناس كتيره ماخدتش بالها من المشاهد دي المتنفذه بذكاء وبفضل اخراج خالد مرعي


الفيلم مركز علي حالتين حاله احمد حلمي بشخصيته الجديده تماما علي الناس والمثيره للشفقه واللي اداها بتميز تام احمد حلمي واعتمد فيه علي body language وكان فيه زووم علي وشه وهو في مراحل الاضطراب ومراحل التوهان


الحاله التانيه العامه اللناس علاقتهم ببعض رد الفعل الجاهز للتلقي والافكار المسبقه والجو المشحون مابين الناس بدون حتي يعرفوا بعض حاله الغربه اتقدمت بشكل خفيف لكنها شدت انتباهي خاصه ان فعلا الناس مابقتش تهتم انها تتعرف علي بعض الكل عايش غريب في مجتمع اصبح شبه مفكك

والنظره السوداويه العامه اللي كنا شايفينها من وجهه نظر حسن تجاه الناس
الفيلم مش عن حسن وبس عنننا كلنا

احمد ممثل كويس جدا يمكم اداءه هنا يعتبر الافضل في تاريخه الفني بعد سهر الليالي وكده رضا وصايع بحر

احمد غامر وجازف انه يقدم فيلم جديد تماما انساني ونفسي بالمقام الاول بس اعتمد ان الجمهور اصبح يتقبل التغيير واعتمد ان الجمهور بيدخله الفيلم علشان هو وبس بغض النظر عن القصه


علاقه احمد باوالده محمود حميده كانت جميله للغايه ومعظم مشاهدهم مع بعض كانت رائعه وعلاقته المتوتره مع مني شلبي نفس الشيء


علاقه احمد بمحمد شرف كانت جميله جدا وشخصيه محمد شرف نفسها ثريه جدا كان نفسي يتم التركيز عليها شخصيه المواظن اللي ضاعت حياته وعدت ادامه وهو لسه قاعد مكانه صحيح هي ظهرت في 3 مشاهد لكنها كانت كافيه لشد انتباه الناس كلها

خالد مرعي زي ماقدم السنه اللي فاتت تيمور وشفيقه اللي كان عمل جميل وخفيف بيثبت نفسه اكتر هنا كمخرج متمكن في ادواته الاخراجيه وكان فيه مشاهد له زي مشهد ملعب الاسكواش ومشهد العين السخته روعه واللي شاف الفيلم هيعرف انا اقصد ايه خاصه انهم كانوا ضرورين في تتابع الاحداث وتتابعات النهايه

عيب الفيلم الوحيد هو ان طابع الفيلم نفسه بالصوره والديكور والموسيقي والتصوير واستابل اخراج الفيلم امريكي Laughing

وده فعلا ظهر قبل كده السنه اللي فاتت في تيمور وشفيقه وغاظني

يعني كان ممكن يتعمل بجو مصري شويه مكانش هيجري حاجه جو واقعي في طبقه متوسطه كان هيبقي احسن لكن المشكله ان خالد وحلمي وايمن بيكتبوا اغلب افلامهم عن طبقه صحيح متوسطه بس مابتعبرش عن المصريين اوي يعني مثلا هاله خليل بتعمنل افلام عن طبقه معقوله زي فيلم قص ولزق ووحيد حامد وخالد يوسف ( رغم اعتراضي علي اسلوب خالد الصادم)

استيل الاغاني الامريكي وحتي بعض القطات اللي شبيه بافلام السبعينات الامركيه مش هانكر انها كانت رائعه وده بفضل تاثر صناع الفيلم بالشكل ده ويمكن لاول مره يتقدم في السينما المصريه

Arrow



بالنهايه الفيلم رائع جدا واكيد هيبقي منافس شرس في ال الشهر ونص الفاضلين بين كميه الفلام الموجوده خاصه مع قرب نزول فيلم احمد مكي وفيلم عادل امام المكتسح بنجاح حاليا


احمد هيكون الحصان الرابح اكيد للصيف زي كل سنه واثبت زكائه عندما اختار منطقه جديده عليه نوعا ما وان كنت افضل السنه الجايه يعمل برده نوعيه جديده زكيه مغامره علشان يجدد من نفسه


تقييمي للفيلم 8 من 10

[صااافي الاصلية]

ليل ونهار
آسف علي الإزعاج !
المحرر

السينما دي غريبة جداً.. مثل كل شيء في حياتنا.. تعطيها تعطيك.. ويكتمل نجاحها بفهم ووعي حقيقي لما يطلبه الناس دون افتعال.. ثم عدم العناد بأن الأشياء الصادمة أو الجارحة للمشاعر هي العبقرية بعينها. أو انهم وحدهم يملكون طبخة أو توليفة النجاح.. ثم تجيء الضربة بالفشل الذريع فيصرخون.. ويتهمون النقاد بأبشع التهم. وكأننا نحن من يصنع الأفلام!!
أسوق هذا الكلام بمناسبة فيلم "آسف علي الازعاج" للكوميديان أحمد حلمي. والذي يفاجئك في أكثر من فيلم بوجود ما يسمي "باتقان العمل الفني" حتي ولو كان كوميديا أو صيفيا أو تجاريا!! ولكن عدم وجود معني "الاتقان" هذا هو أُس فساد السينما عندنا.. لاعتقاد البعض بأن عبقريته وحدها تكفي.. فيتدخل في عمل المخرج والمؤلف والمصور والناقد وحتي الجمهور كمان.. أو بفرض الشطط الجنسي علي الناس!
الدراما هنا بسيطة ولكنها بليغة.. خطها شاعر الأغاني أيمن بهجت قمر في سيناريو متماسك رغم مفاجأته الدرامية الخاضعة لتفاصيل وجزئيات مهمة تكتشف مدي الحرص عليها منذ بداية العمل وقد يكون هناك اقتباس من فيلم بروس ويلز الشهير "الحاسة السادسة" ولكنه اقتباس محمود لا يستنسخ سوي ما يطلبه الموضوع ويكون في خدمة الغرض بلا زيادة أو نقصان. وهذه براعة تحسب للمؤلف كما تحسب للمخرج خالد مرعي في ثاني تجربة له أيضا مع السينما بالتأكيد هي الأفضل لكليهما معاً!!
اننا نعيش مع مهندس الطيران الشاب حسن "أحمد حلمي" وهو وحيد والديه "محمود حميدة ودلال عبدالعزيز" ولديه طاقة عطاء غير محدودة ولكن أحلامه دائما محبطة مما أوقعه في مرض نفسي بسبب عدم فهم من حوله لطبيعة مشاعره.. ارتبط ارتباطاً وثيقا بأبيه الذي يعامله كصديق.. وعندما يموت هذا الأب لا يجد الشاب ما يؤنس وحدته غير استعادة وجود هذا الأب في حياته.. أو في خياله!!
يدخل الفيلم في منطقة تداعيات شيقة. خاصة وهو يتعامل مع الأم التي لا تري غير ابنها. ومع الأب الذي لا يراه سواه.. ثم مع حبيبة "منة شلبي" تصادف أن تعرف بها ثم استحضرها في كل تفاصيل حياته!
أتذكر بعدما انتهي الفيلم كيف كان الحرص علي ألا يلتقي الأب والأم في تعامل حسي. أو كيف كانا يلعبان الاسكواش والشاب وحده يصد ويرد الكرة دون مشاركة حقيقية من الوالد.. أو كيف كان يحميه الأب في عثراته وكأنها حماية ذاتية أو روحانية منفصلة عن الحياة الطبيعية.. كلها تفاصيل مهمة وموحية وتضع البناء في سياق جمالي يتسق مع الموضوع ويدعم قوة التشكيل العام..
له حق محمود حميدة يشارك في دور الأب في موضة عودة الكبار لمشاركة الشبان.. فالدور به مغامرة ومفاجأة برغم بساطة تناوله الخادعة لخضوعه لتلاعب ابداعي من حيل التشويق.. وأحمد حلمي يصنع لنفسه مكانة خاصة به بين أبناء جيله عرف كيف يصنعها.. ويحقق بها الايرادات أيضا دون فزلكة أو عناد.. ودلال عبدالعزيز ومنة شلبي رغم صغر دوريهما إلا أن حضورهما الملموس أضفي علي الأحداث أهمية بالغة بعفوية المحاكاة التي تمزح بالكوميديا وهي تخبيء التراجيديا في جوفها!!

[صااافي الاصلية]

جمع نقاد وصحفيون متخصصون مصريون شاهدوا فيلم "آسف على الإزعاج"، خلال الأيام الأولى من عرضه الذي بدأ الأربعاء الماضي، على أنه الفيلم الأفضل خلال موسم الصيف الحالي، وأن عناصره الفنية المتكاملة تؤهله لحصد إيرادات تتجاوز غيره من الأفلام.


ورصدت وكالة الأنباء الألمانية (د.ب.أ) آراء عدد ممن شاهدوا الفيلم المعروض حاليًا، والذي يشهد إقبالاً واسعًا من الجمهور، منذ بدء طرحه إذ يعد الفيلم الأكثر انتشارًا في دور العرض حتى الآن بعدد نسخ بلغ 119 نسخة.


وقال الناقد والصحفي في "أخبار اليوم" محمد قناوي إن الفيلم جمع ما بين البساطة في التناول والأداء الرائع لأبطاله خاصةً أحمد حلمي الذي يعتبر الفيلم بدايةً لمرحلة جديدة في حياته الفنية، مؤكدًا أنه تخطي حاجز القدرة على الإضحاك إلى إمكان تقديم عمل متكامل.


واعتبر الصحفي بمجلة "صباح الخير" الأسبوعية محمد عبد الرحمن الفيلم استكمالاً لأسلوب بدأه أحمد حلمي في فيلمه السابق "كده رضا" يعتمد على تقديم أفلام تتميز بجهد سينمائي وفني كبيرين بعد سلسلة من الأفلام الكوميدية البسيطة التي أعطته مزيدًا من الثقة لدى الجمهور والمنتجين.



وزاد أن عددًا من المشاهد "أمريكية" تمامًا، ومنها مشاهد العلاج النفسي الجماعي ودخول المطار، والخروج منه، وأنه برغم أن المخرج قدمها بشكل متقن إلا أنه كان من المفضل أن يعتمد على أسلوب شرقي بدلاً من ذلك.


ولفت محمد قناوي إلى رسالة واضحة يسعى الفيلم لتقديمها للمسئولين حول ما يواجهه كثير من الشباب الموهوب الذي لا يجد فرصه لإبراز مواهبه.


واتفق معه محمد عبد الرحمن مركزًا على أن الفيلم يقدم أحمد حلمي للمرة الأولى في شخصية شاب يعيش حياة مرفهة، ويعمل في مهنة مميزة عكس كل أفلامه السابقة لكنه مع ذلك ليس شابًا سعيدًا، وليست كل فرصه متاحة.


كتب الفيلم الشاعر أيمن بهجت قمر في ثاني تجاربه السينمائية بعد فيلم "عندليب الدقي"، وأخرجه خالد مرعي في ثاني تجاربه أيضًا بعد "تيمور وشفيقة"، وتدور أحداثه حول مهندس طيران شاب يعاني نوعًا من الفصام، ويسعى إلى تنفيذ اختراع يساعد على تقليل استهلاك الوقود في الطائرات.


ويضم الفيلم أغنية مميزة بصوت المطربة شيرين بعنوان "في المراية" .. تقول كلماتها: "قول ياللي في المراية.. فهمني إيه الحكاية.. فرحان تعبان مرتاح.. حاجات كتير في حياتنا.. اتسببت في حيرتنا.. وأدينا أهوه عايشين.. راضيين رايحين جايين".

[ياسمين_ياسو]

ميرسى صافى على الفيلم والاراء
واعتقد ان احمد حلمى وصل لمرحلة مينفعش يتراجع فيه
وكلام الناس بتقول انه دخل لمرحلة جديدة فى افلامه
انا ان شاء الله داخلة الفيلم قريب واكيد هقول رأئى فيه لما اشوفه

[xcutiex]

Thanxxxx sooo much sweety